Pentagoni ka njoftuar se do të shkurtojë brigadat e trupave amerikane në Evropë nga katër në tre, duke rikthyer praninë ushtarake amerikane në Evropë në nivelet e vitit 2021.
Sipas një deklarate zyrtare, vendimi është rezultat i një procesi të gjerë dhe të detajuar rishikimi mbi vendosjen e forcave amerikane në kontinent dhe për pasojë, do të ketë një shtyrje të përkohshme të dislokimit të trupave amerikane në Poloni, vend që SHBA e konsideron një aleat model, shkruan a2 CNN.
“Vendimi është rezultat i një procesi gjithëpërfshirës dhe shumështresor të përqendruar në qëndrimin e forcave amerikane në Evropë. Kjo rezulton në një vonesë të përkohshme në vendosjen e forcave amerikane në Poloni, një vend që është një aleat model për Shtetet e Bashkuara", thuhet në deklaratë, përcjell A2 CNN.
Sekretari amerikan i Mbrojtjes, Pete Hegseth, zhvilloi një bisedë me zv/kryeministrin dhe ministrin polak të Mbrojtjes, ËWładysłaë Kosiniak-Kamysz. Pentagoni theksoi se do të vazhdojë koordinimin e ngushtë me autoritetet polake për të garantuar një prani të fortë ushtarake amerikane në Poloni.
“Sekretari i Mbrojtjes Pete Hegseth u konsultua sot me zëvendëskryeministren polake Kosiniak-Kamysz; Departamenti do të mbetet në kontakt të ngushtë me homologët polakë ndërsa shqyrtimi përparon, duke përfshirë edhe sigurimin që Shtetet e Bashkuara të mbajnë një prani të fortë ushtarake në Poloni”.
Në deklaratë thuhet gjithashtu se Varshava ka treguar se ka “kapacitetin dhe vendosmërinë për t’u mbrojtur vetë”, ndërsa aleatët e tjerë të NATO-s duhet të ndjekin të njëjtin shembull, shkruan A2 CNN.
“Varshava ka demonstruar si kapacitetin ashtu edhe vendosmërinë për t'u mbrojtur në mënyrë autonome. Aleatët e tjerë të NATO-s duhet të ndjekin shembullin. Departamenti do të ofrojë informacione të mëtejshme në kohën e duhur dhe në forumin e duhur", përfundon deklarata.
Pentagoni bëri të ditur se vendosja përfundimtare e tre brigadave dhe forcave të tjera amerikane në Evropë do të përcaktohet pas analizave mbi nevojat strategjike dhe operative të SHBA-së, si edhe mbi kontributin që aleatët evropianë mund të japin për mbrojtjen e kontinentit.
“Pentagoni do të përcaktojë vendndodhjen përfundimtare të tre brigadave dhe forcave të tjera amerikane në Evropë bazuar në analiza të mëtejshme të kërkesave strategjike dhe operacionale të SHBA-së, si dhe aftësinë e vetë Aleatëve për të kontribuar me forcat e tyre në mbrojtjen e Evropës".
Sipas autoriteteve amerikane, kjo analizë synon të mbështesë agjendën “America First” të presidentit Donald Trump, duke nxitur vendet e NATO-s të marrin më shumë përgjegjësi për mbrojtjen konvencionale të Evropës. (A2 Televizion)
A2 CNN Livestream
MUND TE LEXONI GJITHASHTU
