Një sulm ajror izraelit vrau një person dhe vajzën e tij 8-vjeçare në Rripin e Gazës. Kështu kanë bërë me dije zyrtarët e shëndetësisë.
Mohamed Abu Selmia, kreu i Spitalit Al Shifa, objektit më të madh mjekësor të enklavës, tha se sulmi ajror goditi një automjet në qytetin perëndimor të Gazës, duke vrarë Youssef Akila dhe vajzën e tij, Wafaa, dhe duke plagosur gjashtë të tjerë.
Një zëdhënës i ushtrisë izraelite tha se forcat shënjestruan një militant të Hamasit dhe se ushtria po heton ende rezultatet e sulmit.
Më vonë të dielën, dy sulme të ndara izraelite vranë dy persona të tjerë, përfshirë një fëmijë në Qytetin e Gazës, thanë mjekët.
Ata shtuan se një sulm izraelit vrau të paktën një burrë pranë kompanisë së telekomunikacionit në lindje të qytetit të Gazës, ndërsa një tank izraelit në një shkollë ku strehoheshin familje të zhvendosura vrau një djalë 3-vjeçar, duke e çuar numrin e të vdekurve të së dielës në të paktën katër.
Një armëpushim i mbështetur nga SHBA-të në tetor 2025 ndaloi luftimet e mëdha në territor, por nuk arriti t'i jepte fund sulmeve nga ushtria izraelite, të cilat thanë se synonin të pengonin sulmet nga Hamasi dhe militantët e tjerë të Gazës.
Hamasi akuzon Izraelin për shkelje të armëpushimit dhe minimizimin e përpjekjeve për të zbatuar planin më të gjerë të Presidentit të SHBA-së Donald Trump për t'i dhënë fund konfliktit në Gaza, i cili përfshin gjithashtu tërheqjen e Izraelit dhe çarmatimin e Hamasit.
Sakaq, Bastisjet izraelite në Kfar Reman, në Libanin jugor, të cilat ndodhën gjatë natës të së dielës, kanë lënë të paktën 11 të vdekur. Mediat libaneze raportuan se nëntë persona u vranë në një sulm ndaj një ndërtese, ndërsa një viktimë tjetër po ngiste një motoçikletë. Midis të vdekurve ishin fëmijë, përfshirë një foshnjë dy muajshe. (A2 Televizion)
A2 CNN Livestream
MUND TE LEXONI GJITHASHTU
