Media amerikane “Axios” ka zbuluar se Shtetet e Bashkuara dhe Rusia po zhvillojnë negociata sekrete për një plan me 28 pika që synon t’i japë fund luftës në Ukrainë. Dokumenti, i hartuar pa praninë e Kievit dhe pa konsultim me aleatët europianë, ka shkaktuar shqetësim të thellë në kryeqytetet e NATO-s, pasi mund të riformësojë arkitekturën e sigurisë në kontinent dhe marrëdhëniet e Uashingtonit me Moskën e Kievin.
Plani po shtyhet përpara nga Steve Witkoff, i dërguar special i presidentit Donald Trump për Rusinë dhe Lindjen e Mesme, si dhe nga Kiril Dmitriev, emisari i Kremlinit. Sipas burimeve të Axios, dokumenti përfshin garanci të reja sigurie për Europën, kushtet për përfundimin e konfliktit dhe konturet e marrëdhënieve të ardhshme strategjike mes SHBA-së, Rusisë dhe Ukrainës. Mënyra si po zhvillohet dialogu kujton kanalet paralele të përdorura para Marrëveshjeve të Minskut, por këtë herë me Europën tërësisht jashtë lojës, shkruan A2 CNN.
Witkoff pritej të takohej në Stamboll me presidentin ukrainas Volodimir Zelenski, por vizita u shty. Megjithatë, ai zhvilloi një takim në Miami me Rustem Umérov, kreun e Këshillit të Sigurisë Kombëtare të Ukrainës, figurë kyçe në negociatat e këtij viti. Ndërkohë, Zelenski mbërriti në Ankara pas vizitës në Madrid, për bisedime me presidentin turk Recep Tayyip Erdogan, i cili po forcon rolin e Turqisë si ndërmjetës kryesor mes Moskës, Kievit dhe Uashingtonit.
Trump kërkon një fitore diplomatike që do t’i projeksionojë lidership ndërkombëtar dhe do të hapë mundësinë për një marrëdhënie të re me Rusinë. Putin synon garanci strategjike, lehtësim të sanksioneve dhe njohje të heshtur të avancimeve territoriale. Ukraina kërkon të mos anashkalohet dhe të sigurojë një “paqe të drejtë”. Europa, ndërkohë, frikësohet nga margjinalizimi dhe rrezikimi i kohezionit të NATO-s. (A2 Televizion)
A2 CNN Livestream
MUND TE LEXONI GJITHASHTU
