Sipas exit-poll-eve të para të CBS News pas daljes së votuesve nga qendrat e votimit, Presidenti Donald Trump po shënon nivelin më të ulët të aprovimit nga elektorati për një president amerikan në zgjedhjet e mesmandatit, përcjell A2CNN.
Aktualisht, vlerësimi i tij është 38%, më i ulët se gjatë mandatit të tij të parë dhe gjithashtu më i ulët se ai i George W. Bush në vitin 2006, kur partia e tij humbi kontrollin e të dyja dhomave të Kongresit.
Zgjedhjet e mesmandatit shpesh janë konsideruar si një referendum për presidentin në detyrë dhe kjo garë nuk bën përjashtim. Rreth 6 në 10 votues thonë se Trump është një faktor në vendimin e tyre për votën në Dhomën e Përfaqësuesve.
Kjo prirje nxitet kryesisht nga votuesit që mbështesin demokratët, të cilët në shumicën dërrmuese motivohen nga kundërshtimi ndaj Trumpit.
Ndërsa për ata që mbështesin republikanët, situata është ndryshe dhe vota e tyre lidhet më pak me presidentin. Në vitin 2018, shumica e votuesve republikanë deklaronin se votonin për të mbështetur Trumpin. Kjo përqindje është më e ulët sot.
Presidenti u ka kërkuar shpesh mbështetësve të tij të sillen sikur emri i tij të ishte në fletën e votimit dhe, për shumë prej votuesve të bazës MAGA, kjo duket se po ndodh.
Shumica e republikanëve të rrymës MAGA thonë se votojnë për të mbështetur Trumpin, ndërsa shumica e republikanëve që nuk i përkasin kësaj lëvizjeje deklarojnë se presidenti nuk është një faktor në vendimin e tyre për votën.
(A2 Televizion)
A2 CNN Livestream
MUND TE LEXONI GJITHASHTU
