Është përshkallëzuar më tej lufta midis Izraelit dhe Libanit. Me anë të një njoftimit Tel-Avivi ka bërë me dije se dy ushtarë të tij u vranë në Libanin jugor të mërkurën, ndërsa autoritetet libaneze thanë se sulmet hakmarrëse izraelite vranë të paktën një person; ky përshkallëzim i dhunës përkoi me raundin më të fundit të bisedimeve midis dy vendeve.
Bisedimet në Romë, të cilat filluan të martën dhe pritet të vazhdojnë deri të enjten, pasojnë marrëveshjen e arritur në qershor mes dy vendeve për një plan sigurie të ndërmjetësuar nga SHBA-ja, që synonte zbutjen e armiqësive përgjatë kufirit.
Pavarësisht armëpushimit, Izraeli shpalli një zonë tampon në Libanin jugor, ku trupat e tij vazhdojnë të operojnë për të eliminuar atë që e konsideron si kërcënim nga grupi Hezbollah (i mbështetur nga Irani) ndaj kufirit të tij.
Dy ushtarët u vranë dhe katër të tjerë u plagosën nga një shpërthim në një ndërtesë ku kishin hyrë si pjesë e një operacioni kontrolli sigurie, thekson ushtria izraelite.
Duke iu referuar një burimi të sigurisë, Radioja e Ushtrisë tha se ishte ende e paqartë se kur ishte vendosur pajisja shpërthyese në ndërtesë – nëse kjo kishte ndodhur para apo pas armëpushimit.
Të mërkurën, ushtria izraelite fillimisht e përshkroi incidentin si "një shkelje flagrante të armëpushimit" nga ana e Hezbollahut, veprim që çoi në nisjen e një sërë sulmesh hakmarrëse në Libanin jugor.
Megjithatë, të enjten, në një deklaratë ku shprehte ngushëllime për vdekjen e ushtarëve, Ministri izraelit i Mbrojtjes, Israel Katz, nuk e përmendi Hezbollahun apo ndonjë shkelje të armëpushimit, duke lënë të kuptohet se Izraeli nuk po kërkonte të përshkallëzonte sulmet.
Faqja e internetit e ushtrisë izraelite tregon se data e fundit kur një ushtar ishte vrarë në Libanin jugor ishte 28 qershori.
Ministria libaneze e Shëndetësisë njoftoi të mërkurën se një person u vra dhe 12 të tjerë u plagosën nga një sulm izraelit në qytetin jugor Tibnin – rreth 25 km larg Mansourit – për të cilin ushtria izraelite kishte lëshuar një paralajmërim për evakuim; ky ishte paralajmërimi i parë online për Libanin në më shumë se një muaj. (A2 Televizion)
A2 CNN Livestream
MUND TE LEXONI GJITHASHTU
