Ministri i Punëve të Brendshme të Kosovës, Xhelal Sveçla, ka konfirmuar sot arrestimin e një zyrtari policor si pjesë e një operacioni të madh kundër spiunazhit. Sveçla u shpreh se, për shkak të ndjeshmërisë së rastit, ende nuk mund të japë shumë detaje, por theksoi se ky operacion është “jashtëzakonisht i rëndësishëm për sigurinë kombëtare”.
Operacioni është duke u zhvilluar nga Prokuroria Speciale e Republikës së Kosovës, në bashkëpunim me Agjencinë Kosovare të Inteligjencës (AKI) dhe Policinë e Kosovës.
I arrestuari është Bojan Jevtiq, zyrtar policor nga komuniteti serb, i cili ushtronte detyrën e zëvendëskomandantit në pikën kufitare “Dheu i Bardhë”. Ai dyshohet se ka transferuar informacione të klasifikuara shtetërore tek agjencitë serbe.
Prokuroria Speciale ka bërë të ditur se veprimet po ndërmerren nën dyshimin për veprën penale të spiunazhit, ndërsa hetimet janë ende në vazhdim.
Ky nuk është rasti i vetëm i këtij lloji – kujtojmë se edhe më herët janë arrestuar persona të dyshuar për spiunazh. I fundit që u përball me akuza të ngjashme ishte Hysri Selimi. (A2 Televizion)
A2 CNN Livestream
MUND TE LEXONI GJITHASHTU
