Tre gjyqtarë janë caktuar në Panelin e Apelit për çështjen e ish-krerëve të Ushtrisë Çlirimtare të Kosovës në Dhomat e Specializuara të Kosovës. Ata janë Michele Picard, Kai Ambos dhe Nina Jørgensen.
Përmes një njoftimi, Dhomat e Specializuara të Kosovës kanë bërë të ditur se Presidentja e Dhomave të Specializuara, gjyqtarja Ekaterina Trendafilova, ka caktuar Panelin e Apelit për të vendosur lidhur me kërkesën e ekipeve të mbrojtjes për zgjatjen e afatit për paraqitjen e njoftimeve të apelit.
Paneli do të shqyrtojë gjithashtu të gjitha parashtresat e palëve që lidhen me njoftimin e apelit ndaj Aktgjykimit të Gjykimit në këtë çështje.
“Në vendimin e saj, Presidentja mori parasysh kriteret e përcaktuara në Rregullën 4 të Rregullores për Caktimin e Gjyqtarëve, përfshirë përvojën dhe ekspertizën përkatëse, si dhe disponueshmërinë e gjyqtarëve në këtë kohë”, thuhet në njoftimin e Dhomave të Specializuara.
Aktgjykimi i shkallës së parë për ish-krerët e UÇK-së u shpall më 16 shtator. Gjykata shqiptoi një dënim total prej 81 vitesh burgim për Hashim Thaçin, Kadri Veselin, Jakup Krasniqin dhe Rexhep Selimin.
(A2 Televizion)
A2 CNN Livestream
MUND TE LEXONI GJITHASHTU
