Ministri në detyrë i Bujqësisë në Kosovë, Faton Peci, është zyrtarisht kandidati i përbashkët i Lëvizjes Vetëvendosje dhe Partisë Guxo për kryetar të komunës së Mitrovicës.
VV njoftoi se kandidatura e Pecit ka mbështetjen unanime të degës së saj në Mitrovicë, të udhëhequr nga deputeti Armend Muja.
“Lëvizja VETËVENDOSJE mbështet fuqishëm kandidaturën e Faton Pecit për kryetar të komunës së Mitrovicës. Më 12 tetor, Mitrovica guxon të vetëvendosë për fitoren e madhe në komunë. Në mbledhjen e mbajtur sot kryesia e qendrës, drejtuar nga kryetari i qendrës së Lëvizjes VETËVENDOSJE! në Mitrovicë, deputeti Armend Muja, vendosi unanimisht që të mbështesë kandidaturën e Faton Pecit nga Partia Guxo për kryetar të komunës”, ka shkruar VV-ja në rrjetet sociale.
Sipas VV-së, Peci është zgjidhja më e mirë për qytetin, duke e vlerësuar për integritetin dhe sukseset si ministër, veçanërisht në fushën e bujqësisë dhe zhvillimit rural.
“Me mbështetje të fuqishme dhe të pakushtëzuar nga Lëvizja, Faton Peci vjen si zgjidhja më e mirë për Mitrovicën. Ai nuk është vetëm një emër i njohur për integritetin dhe përkushtimin e tij institucional, por edhe një prej ministrave më të suksesshëm të Qeverisë Kurti, i cili ka sjellë investime dhe reforma të thella në bujqësi, zhvillim rural dhe përkrahje për fermerët në çdo cep të vendit”, thuhet tutje në deklaratë. (A2 Televizion)
A2 CNN Livestream
MUND TE LEXONI GJITHASHTU
