Atalanta fitoi 1-0 përballjen direkte ndaj Juventusit për zonën Champions, duke parakaluar në renditje bardhezinjtë, të cilët tashmë e shohin veten në vendin e katërt.
Një gol i Malinovsky në pjesën e dytë, pas një devijimi të Alex Sandros, i dha 3 pikët bergamaskëve, që bëjnë një hap të sigurt drejt pjesëmarrjes sezonin tjetër në kompeticionin më të rëndësishëm evropian për klube.
Ndërkohë, Lazio e vendit të gjashtë fitoi 5-3 ndaj Beneventos, duke iu afruar 4 pikë Juventusit, por me një ndeshje më pak sesa bardhezinjtë.
Milani arriti të mbajë vendin e dytë në klasifikim, pas fitores me vështirësi ndaj Genoas në San Siro, në ndeshjen e parë të së dielës. Kuqezinjtë kaluan në avantazh me një gol të bukur të Ante Rebic, në pjesën e parë, por Destro barazoi me kokë, pas një goditjeje këndi, duke barazuar shifrat.
Në pjesën e dytë, Milan riktheu avantazhin pas autogolit të sulmuesit kryesor të miqve, Scamacca, i cili pati fatin e keq që të devijonte me shpinë në portën e tij krosimin e Calhanoglu nga këndorja.
5 minuta nga fundi, ekipi i Stefano Piolit rrezikoi që të barazohej, por Kjaer dhe Tomori larguan dy herë topin nga vija fatale, pas një gabimi të portierit Donnarumma. (A2 Televizion)
A2 CNN Livestream
MUND TE LEXONI GJITHASHTU
