Shqipëria dhe Kosova nënshkruajnë 15 marrëveshje, ngrihet sekretariat ndërkoordinues për jetësimin e tyre

Në Elbasan, u zhvillua mbledhja e shtatë mes dy qeverive, Shqipëri-Kosovë. Fokusi ishte finalizimi i marrëveshjeve të nënshkruara që do të menaxhohen nga sekretariati ndërkoordinues. Në mbledhjen e dy qeverive, Edi Rama dhe Albin Kurti theksuan nevojën për zbatimin e marrëveshjeve të nënshkruara ndërmjet dy vendeve. Rama ftoi qeverinë e Kosovës, që krahas marrëveshjeve, të bëjnë edhe unifikimin e abetareve në dy shtetet. Albin Kurti, nga ana e tij, e cilësoi si detyrim bashkëpunimin Kosovë-Shqipëri.

Mes 15 marrëveshjeve që u firmosën, është dhe ajo për heqjen e lejeqëndrimit të përkohshëm për qytetarët e të dyja vendeve, njohja e sigurimeve shoqërore dhe për lehtësira të ndërsjella në procedurat doganore të hyrje-daljes së mallrave.

15 marrëveshjet që firmosen sot mes qeverive të Shqipërisë dhe Kosovës (A2 Televizion)

• Marrëveshja ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për heqjen e lejeqëndrimit të përkohshëm;
• Marrëveshja ndërmjet Qeverisë së Republikës së Kosovës dhe Këshillit të Ministrave të Republikës së Shqipërisë për rregullimin e regjimit të trafikut lokal të kufirit;
• Marrëveshja ndryshuese e Marrëveshjes ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për hapjen e pikës së përbashkët të kalimit kufitar Shishtavec (Kukës) – Krushevë (Dragash);
• Marrëveshje ndërmjet Këshillit të Ministrave të Republikës së Shqipërisë dhe Qeverise se Republikës së Kosovës “Për ndihmë të ndërsjellë juridike në çështjet civile dhe tregtare”;
• Për miratim, në parim, të marrëveshjes, ndërmjet Republikës se Shqipërisë dhe Republikës së Kosovës, për sigurimet shoqërore;
• Marrëveshje ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për zbatimin e lehtësirave të ndërsjella në procedurat doganore dhe/ose të kontrollit të hyrje/daljes së mallrave;
• Marrëveshje Bashkëpunimi: Në fushën e Trashëgimisë Kulturore midis MKRS & MK;
• Protokoll Bashkëpunimi Ndërmjet Këshillit të Ministrave të Republikës së Shqipërisë dhe Qeverisë së Republikës së Kosovës për krijimin e Sekretariatit Koordinues Ndërqeveritar.
• Marrëveshje për studimin e fizibilitetit për ndërtimin/rehabilitimin e segmentit hekurudhor Durrës-Prishtinë;
• Marrëveshje bashkëpunimi ndërmjet Ministrisë së Shëndetësisë dhe Mbrojtjes Sociale të Republikës së Shqipërisë dhe Institucionit kompetent të palës kosovare;
• Marrëveshje dypalëshe për lehtësimin e procedurës së njohjes se diplomave nga IAL-të (të konfirmimit të të diplomuarve nga Qendrat Kombëtare respektive të Njohjes së Diplomave);
• Manual i Përbashkët për procedurat standarde të operimit në Doganën e Durrësit;
• Manuali Për procedurat standarde të operimit në piken e përbashkët të kalimit kufitar (PPKK) Morinë-Vermicë;
• Marrëveshje dypalëshe për qasje të ndërsjellë në modulet e riskut;
• Marrëveshje bashkëpunimi ndërmjet Drejtorisë së Përgjithshme të Arkivave të RSH-së dhe Agjencisë Shtetërore të Arkivave të Republikës së Kosovës.