“Disa portale online në Shqipëri dyshohet se përdoren për të ushtruar presion ndaj bizneseve dhe individëve, duke publikuar lajme negative dhe duke kërkuar para për ndalimin e tyre.” Kjo është një nga problematikat e ngritura në një investigim të publikuar nga EU-Policies.
Sipas të dhënave të përmendura në artikull, në vend mund të ketë deri në 900 portale në gjuhën shqipe. Për disa prej tyre nuk ka informacion të qartë se kush i zotëron, kush i drejton apo nga sigurohen paratë për funksionimin e tyre.
Sipas raportimit, disa biznese dhe institucione kanë ngritur shqetësimin se artikujt me informacione të pasakta ose të shtrembëruara mund të përdoren për të dëmtuar imazhin e tyre dhe për të kërkuar përfitime financiare.
Në artikull përmendet edhe shqetësimi i përfaqësuesve të sektorit bankar dhe të biznesit për publikimet që mund të ndikojnë në reputacionin e kompanive, marrëdhëniet me klientët dhe aktivitetin e tyre ekonomik.
Artikulli i i plotë:
Rritja e portaleve online në Shqipëri po shoqërohet me shqetësime për mungesën e transparencës mbi pronësinë, financimin dhe mënyrën e funksionimit të disa prej tyre. Një investigim i publikuar nga media ndërkombëtare “Transitions” ngre dyshime se një pjesë e këtyre platformave përdoren si instrumente presioni ndaj bizneseve, përmes publikimit të artikujve negativë dhe kërkesave për pagesa në këmbim të ndalimit të tyre.
Në fokus të raportimit është edhe një rast i ndodhur në shkurt, kur Prokuroria arrestoi administratorin e portalit Priza.al. Sipas hetimeve, ai dyshohet se i kishte kërkuar 40 mijë euro një personi, i cili ishte bërë objekt i disa artikujve kritikë, duke i ofruar ndalimin e publikimeve negative në këmbim të pagesës. Shuma dyshohet se ishte ulur më pas në 20 mijë euro, ndërsa arrestimi u krye më 12 shkurt, në momentin kur i dyshuari po merrte 5 mijë euro. Çështja mbetet në fazën e hetimit dhe pretendimet nuk janë provuar me vendim gjyqësor.
Sipas investigimit, në Shqipëri operojnë qindra portale në gjuhën shqipe, ndërsa vlerësimet e cituara nga Autoriteti i Mediave Audiovizive flasin për një numër që mund të arrijë deri në 900. Krahas mediave që kanë redaksi dhe struktura të mirëfillta gazetareske, raportohen edhe faqe interneti për të cilat mungojnë të dhënat e qarta mbi pronësinë, stafin editorial dhe burimet e financimit.
Raporti i Komisionit Evropian për Sundimin e Ligjit, i publikuar në korrik 2026, evidenton përmirësime në legjislacionin shqiptar për transparencën e pronësisë në media, por thekson se kërkesat e reja për deklarimin e pronësisë nuk përfshijnë mediat e shkruara dhe ato online. Komisioni ngre gjithashtu shqetësime për ndikimin politik dhe ekonomik mbi mediat, përqendrimin e pronësisë dhe mungesën e rregullave transparente për reklamimin shtetëror.
Investigimi ndalet edhe te vështirësitë financiare të tregut mediatik, ku të ardhurat nga reklamat shpesh nuk mjaftojnë për të mbështetur aktivitetin e një redaksie. Sipas raportimit, kjo situatë krijon hapësira për financime nga aktorë të interesuar politikë dhe ekonomikë, duke rritur rrezikun që publikimi i lajmeve të përdoret për përfitime private.
Shqetësime për këtë fenomen kanë ngritur edhe përfaqësues të sektorit bankar dhe të biznesit. Shoqata Shqiptare e Bankave ka raportuar raste të publikimeve që, sipas saj, përmbajnë të dhëna të shtrembëruara dhe pretendime të dyshimta ndaj institucioneve financiare dhe drejtuesve të tyre. Ndërsa përfaqësues të biznesit kanë paralajmëruar për dëmet që publikime të tilla mund t'u shkaktojnë kompanive, përmes humbjes së klientëve dhe dëmtimit të reputacionit.
Drejtori i Institutit Shqiptar të Medias, Remzi Lani, ka ngritur shqetësimin për përdorimin e platformave mediatike për përfitime financiare, duke bërë dallimin mes raportimit kritik, që është pjesë e funksionit të medias, dhe kërkesave për para në këmbim të heqjes së artikujve apo ndërprerjes së publikimeve.
Nga ana tjetër, raportimi thekson se lufta kundër këtij fenomeni duhet të shmangë kufizimin e lirisë së medias. Gazetarët investigativë në Shqipëri vijojnë të përballen me presione, kërcënime dhe padi, veçanërisht kur raportojnë për korrupsionin, krimin e organizuar dhe kontratat publike.
Në këtë kontekst, sfida për institucionet shqiptare mbetet forcimi i transparencës mbi pronësinë dhe financimin e mediave, si dhe ndëshkimi i rasteve të provuara të shantazhit, pa cenuar të drejtën e gazetarëve për të hetuar dhe raportuar mbi çështje me interes publik.
Sipas investigimit, problemi nuk lidhet vetëm me dëmin që mund t'u shkaktohet individëve apo kompanive të veçanta, por edhe me besueshmërinë e gazetarisë. Kur lajmet përdoren si mjet presioni ose si instrument për përfitime financiare, dëmtohet besimi i publikut te media dhe te informacioni që ajo përcjell. (A2 Televizion)
A2 CNN Livestream
MUND TE LEXONI GJITHASHTU
