Gazetari Artan Hoxha, i ftuar në studion e “Off the Record” nga Andrea Danglli, në A2CNN, tregoi procedurat nëpër të cilat kaloi në doganë para se të shpallej “non grata” nga Greqia.
“Oficeri i kufirit, më tha: po shoh këtu në sistem që kemi problem. Duhet të kalosh në vijën e dytë se s'ta jap pashaportën, duhet të shkosh atje të marrësh pashaportën. Në vijën e dytë ishte një oficer tjetër, i cili bëri në fillim disa pyetje për gjeneralitetet. Pastaj, pyeti: ti e ke bërë këtë historinë? Duke filluar që nga masakra e Peshkëpisë, pastaj kishte zhvarrimet e Kosinës, ato të ushtarëve grekë, pra varrezat e ushtarëve grekë, deri te ngjarjet e fundit me Kacifas dhe këto me Belerin. Ai bëri vetëm pyetje. Dhe ajo që më bëri përshtypje ishte se kur kalova në vijën e dytë ai më kërkoi që të lë gjurmët e gishtave dhe të bëj foto dhe retinën e syrit dhe e di shumë mirë se për çfarë duhen këto dhe atë moment i them që unë nuk jam kriminel. Unë e dyta, i thashë, nuk di të kem ndonjë proces penal në Greqi. Ai tha, “jo, nuk ka lidhje me këtë, është thjesht procedurë”. Mbarojmë me ato, më la aty në pritje dhe më tha se do të vinte ai i emigracionit”, tregon Hoxha.
“Ai në fakt bënte sikur kishte punë. Unë duke qenë se kam qenë emigrant në Greqi, flas e kuptoj e lexoj greqisht mirë, dhe ai fliste thjesht me familjarë, me miq të vet, duke më mbajtur aty në pritje dhe pastaj kaloi në atë pjesën e vet të arrogancës dhe më dha atë vendimin. Më tha “do ta firmosësh këtë”. Ne po ta komunikojmë çfarë shkruan dhe ti shpallesh njeri i padëshiruar në shtetin grek për shkak të qëndrimeve që ti i ke mbajtur dhe për shkak të rrezikut që ti përbën për rendin kushtetues në Republikën e Greqisë dhe për marrëdhëniet ndërkombëtare të Greqisë me shtete të tjera. Pastaj, sjellja e tij në fund, sepse unë s'po dilja menjëherë se binte shi dhe po llogarisja distancën nga aty deri tek makina, nëse do lagem, s'do lagem, ose nga çfarë rruge do ndjek dhe menjëherë tha: “Largohu nga territori grek! Mos të shoh më aty!” Unë nuk çuditem nga këto veprime sepse unë kam provuar operacionin “Fshesa” në Greqi. E kam provuar “Fshesën” si na kanë mbledhur, na kanë mbajtur e si na kanë trajtuar”, deklaroi më tej gazetari.
Artan Hoxha theksoi se ajo që i bëri përshtypje më mbrapa “është klasifikimi ku ata e kishin futur këtë gjë”.
“Pra, unë nuk e di çfarë rreziku mund të përbëj unë për Greqinë sepse nëse unë do të isha pjesëtar i strukturave të këtij shteti, do e kuptoja. Duket sikur kam qenë me Mihal Gramenon dhe kam marrë pushkën edhe kemi luftuar. Në fakt, unë kam bërë detyrën time si gazetar shqiptar duke raportuar jo për ngjarje historike, por për ngjarje konkrete, aktuale, pra të cilat janë raportime të aktualitetit dhe sigurisht kam bërë këtë gjë, ndryshe mbase nga kolegët e mi të tjerë, unë vazhdimisht i kam qëndruar në kokë këtyre edhe pse i njihja mirë si çështje, por edhe më tërhiqnin dhe shikoja dhe mënyrën se si grekët vazhdimisht përpiqeshin të interferonin brenda territorit shqiptar, interesave që kanë në Shqipëri, interesave që ka Shqipëria vetë...”, shtoi Artan Hoxha.
(A2 Televizion)
A2 CNN Livestream
MUND TE LEXONI GJITHASHTU
