Shqipëria ka regjistruar një rritje të konsiderueshme të numrit të vizitorëve dhe netëqëndrimeve gjatë muajit maj të këtij viti, duke pasqyruar një tendencë pozitive dhe të vazhdueshme në zhvillimin e turizmit në vend.
Të dhënat e publikuara nga Instituti i Statistikave (INSTAT) tregojnë se numri i vizitorëve u rrit me 31,8%, ndërkohë që kontributi më i madh në këtë rritje ka ardhur nga vizitorët jo-rezidentë, me një rritje prej 36,6%. Ndërsa vizitorët rezidentë kanë shënuar një rritje prej 18,6%.
Përveç kësaj, numri i netëqëndrimeve në Shqipëri është rritur me 31,5%, ku vizitorët jo-rezidentë kanë kontribuar me një rritje prej 35,1%, ndërsa netëqëndrimet e vizitorëve rezidentë janë rritur me 20,6%.
Këto të dhëna dëshmojnë një periudhë të suksesshme për sektorin e turizmit dhe japin sinjale të forta se Shqipëria po bëhet gjithnjë e më atraktive për turistët, veçanërisht për ata që vijnë nga jashtë.
Sipas statistikave, shumica e vizitorëve jo-rezidentë kanë ardhur nga Kosova, Italia dhe Gjermania, tregje kyçe që kontribuojnë në turizmin hyrës të Shqipërisë. Konkretisht, 15% e vizitorëve vijnë nga Kosova, 13% nga Italia dhe 9% nga Gjermania. Polonia dhe Franca kontribuan me nga 8%, ndërsa 47% e vizitorëve erdhën nga vende të tjera, duke theksuar diversitetin e tregjeve të huaja që vizitojnë vendin.
Një nga segmentet që ka pasur rritjen më të madhe është zona bregdetare, e cila ka shënuar një rritje prej 47,6% në numrin e vizitorëve. Ky është një tregues i qartë i popullaritetit në rritje të plazheve dhe zonave bregdetare të Shqipërisë.
Akomodimi në hotele dhe struktura të ngjashme ka regjistruar gjithashtu një rritje prej 38,5%, ndërsa norma e shfrytëzimit të dhomave ka arritur në 28,7% në maj 2025, krahasuar me 25,1% në të njëjtin muaj të vitit 2024. Ky tregues tregon përmirësim në menaxhimin e akomodimeve dhe rritje të kërkesës për shërbime turistike në Shqipëri. (A2 Televizion)
A2 CNN Livestream
MUND TE LEXONI GJITHASHTU
