Një tjetër i kërkuar nga drejtësia shqiptare është vënë në pranga pas një operacioni të përbashkët mes Interpol Tiranës dhe autoriteteve spanjolle.
Në kuadër të operacionit ndërkombëtar “The Wanted”, u ekstradua nga Spanja drejt Shqipërisë 34-vjeçari Juxhin Drazhi, i shpallur në kërkim nga Gjykata e Posaçme Kundër Korrupsionit dhe Krimit të Organizuar.
Sipas të dhënave zyrtare, ndaj tij është caktuar masa e sigurisë “Arrest në burg”, për veprat penale: “Trafikimi i narkotikëve” në formën e grupit të strukturuar kriminal, “Grup i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”.
Hetimet e zhvilluara nga SPAK kanë zbuluar se Drazhi ishte pjesë e një organizate kriminale që trafikonte lëndë narkotike drejt Norvegjisë dhe Belgjikës, shkruan A2 CNN.
Ekstradimi i tij u krye pas një bashkëpunimi të ngushtë ndërmjet strukturave të Interpol Tiranës dhe Interpol Madrid, duke finalizuar një tjetër rast të rëndësishëm në luftën kundër trafikut ndërkombëtar të drogës. (A2 Televizion)
A2 CNN Livestream
MUND TE LEXONI GJITHASHTU
