Gjykata e Fierit ka lënë në fuqi masat e sigurisë për drejtuesit dhe punonjësit e kompanisë “Bankers Petroleum”, të arrestuar në kuadër të hetimeve për evazion fiskal dhe mashtrim me të ardhurat.
Në sallën e gjyqit të pandehurit janë shprehur se janë të pafajshëm duke mos pranuar asnjë nga akuzat e ngritura nga prokuroria e Fierit .
Sipas avokatit mbrojtës të ish administratorit Leonidha Çobo, prokuroria ka gabuar rëndë procedurialisht duke e marrë në hetim klientin e tij, pasi të gjitha pretendimet e ngritura janë trajtuar nga vetë Prokuroria Fier në vitet 2020-2021, ku në përfundim është kërkuar pushimi i hetimeve.
Po kështu, çdo pretendim për fshehje të të ardhurave gjatë periudhës kur administrimi i Bankers është kryer nga z. Çobo, është trajtuar nga Gjykata e Arbitrazhit në Paris.
Po sipas avokatit Maksim Sota , Çobo në seancë është prekur moralisht duke thënë se po dëmtohet imazhi i tij padrejtësisht me akuza të padrejta.
Me vendim të Gjykatës së Fierit u lëshuan 14 urdhër arreste, 9 prej tyre të ekzekutuar dhe 5 kinezë ende në kërkim. Ndaj tyre rëndojnë akuzat “Krijimi i skemave mashtruese lidhur me tatimin mbi vlerën e shtuar”, “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Shpërdorimi i detyrës” dhe “Moskryerja e detyrave nga organet tatimore”.
Arrestimi i drejtuesve të Bankers Petroleum me akuzat për fshehje të të ardhurave shënon vetëm kulmin e një marrëdhënieje të tensionuar mes kompanisë kineze dhe shtetit. Historia e përplasjeve në mbi dy dekada “bashkëjetesë të trazuar” mes kompanisë kineze e ka zanafillën shumë më herët.
Operacioni policor u zhvillua në bashkëpunim me Drejtorinë e Përgjithshme të Tatimeve, shkruan A2 CNN. (A2 Televizion)
A2 CNN Livestream
MUND TE LEXONI GJITHASHTU
