Policia hap tenderin e radhës “sekret”, 1 milionë euro për databazën

Policia e Shtetit ka nisur një tjetër procedurë të klasifikuar në fushën e sigurisë, këtë herë për mirëmbajtjen e qendrës së të dhënave, që përbën bazën e infrastrukturës digjitale të institucionit. Fondi kap vlerën e afro 1 milion eurove, ndërsa kontrata do të ketë një afat trevjeçar, shkruan A2 CNN.

Procedura është klasifikuar në nivelin “Sekret”, që do të thotë se zhvillohet sipas një skeme të ndryshme nga tenderët e zakonshëm publikë. Qendra e të dhënave është infrastruktura ku ruhen dhe menaxhohen databazat policore, sistemet operative dhe informacioni i ndjeshëm i strukturave të rendit.

Ky është tenderi i dytë me klasifikim “Sekret” që Policia hap brenda një intervali të shkurtër kohor. Vetëm pak ditë më parë u çel një tjetër procedurë e ngjashme për mirëmbajtjen e sistemit Datacom, rrjeti i brendshëm i komunikimit dhe transmetimit të të dhënave të strukturave policore. (A2 Televizion)