Një 46-vjeçar nga Tirana, ka rënë në prangat e Policisë në Dhërmi me akuzën e shitjes së kokainë. Dyshohet se drogën do ta shiste kryesisht në lokalet e natës në zonën bregdetare të Dhërmiut.
Policia ka sekuestruar 126 doza lënde narkotike kokainë, para të përfituara nga shitja e saj dhe një peshore elektronike.
Njoftimi i Policisë Vlorë
DVP Vlorë/Finalizohet operacioni policor i koduar “Reset”, goditet një tjetër rast i shpërndarjes së lëndëve narkotike.
Vihet në pranga një 46-vjeçar që shiste kokainë në Dhërmi.
Sekuestrohen 126 doza lënde narkotike kokainë, para të përfituara nga shitja e saj dhe një peshore elektronike.
Specialistët e Seksionit për Hetimin e Narkotikëve të DVP Vlorë, në vijim të veprimeve intensive operacionale për goditjen e veprimtarisë kriminale në fushën e narkotikëve, pasi kanë siguruar informacion se një shtetas posedonte lëndë narkotike me qëllim shitjeje, kryesisht në lokalet e natës në zonën bregdetare të Dhërmiut, kanë organizuar dhe finalizuar, në bashkëpunim me shërbimet e Stacionit të Policisë Dhërmi, operacionin policor të koduar “Reset”, si rezultat i të cilit u kap dhe u arrestua në flagrancë shtetasi:
M. M., 46 vjeç, banues në Tiranë.
Gjatë kontrollit në dhomën ku qëndronte ky shtetas, në Drimadhes, shërbimet e Policisë gjetën dhe sekuestruan në cilësinë e provës materiale 126 doza lënde të dyshuar narkotike të llojit kokainë, 136 400 lekë të dyshuara të përfituara nga shitja e lëndës narkotike dhe një peshore elektronike.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme procedurale. (A2 Televizion)
A2 CNN Livestream
MUND TE LEXONI GJITHASHTU
