Skënder Hita është zgjedhur drejtori i ri i Policisë së Shtetit.
Vendimi i marrë sot në mbledhjen e qeverisë është bërë me dije nga ministri i Brendshëm Besfort Lamallari.
Ky i fundit përmes një postimi në rrjetet sociale thotë se vendimi është marrë mbi bazën e meritës, profesionalizmit dhe integritetit.
"Sot në mbledhjen e Këshillit të Ministrave miratuam vendimin për dhënien e gradës Drejtues Madhor dhe emërimin e Drejtorit të Përgjithshëm të Policisë së Shtetit, z.Skënder Hita. Ky është një vendim i bazuar në meritë, profesionalizëm dhe integritet.Skënder Hita ka rezultuar ndër kandidatët më të vlerësuar nga një proces konkurrues, duke dëshmuar përvojë të spikatur, vizion të qartë strategjik dhe angazhim të palëkundur ndaj ligjit dhe qytetarëve", shkruan Lamallari.
"Policia e Shtetit ka një rol kyç në garantimin e rendit dhe sigurisë publike. Prandaj, drejtimi i saj kërkon jo vetëm aftësi profesionale, por edhe ndershmëri, etikë dhe përgjegjësi të lartë publike. Jam i bindur se, nën drejtimin e tij, Policia e Shtetit do të vijojë të forcojë performancën, të rrisë besimin e qytetarëve dhe të përmbushë me përkushtim misionin e saj në shërbim të sigurisë dhe shtetit të së drejtës", vijon ministri.
Deri më sot Hita ka mbajtur postin e drejtorit të Policisë së Fierit. Më parë ai ka mbajtur postin e drejtorit të Policisë në qarqet Durrës, Dibër dhe ka qenë zv.drejtor në Shkodër. (A2 Televizion)
A2 CNN Livestream
MUND TE LEXONI GJITHASHTU
