Tre efektivë policie në Elbasan janë pezulluar nga detyra pas arratisjes së një të ndaluari nga Komisariati i qytetit.
Pezullimi është bërë me urdhër të Prokurorisë pas hetimeve të Agjencisë së Mbikëqyrjes Policore për ngjarjen e ndodhur më datë 3 qershor, kur shtetasi me iniciale B. Z., i ndaluar si person i dyshuar për një vepër penale, është arratisur nga ambientet e komisariatit.
“Është caktuar masa e sigurisë të karakterit ndalues “Pezullimi i ushtrimit të një detyre a shërbimi publik” ndaj tre punonjësve të policisë në Komisariatin e Policisë Elbasan, të dyshuar për "Shpërdorim i detyrës", e konkretisht; - Nënkomisar A. ZH., 35 vjeç, me detyrë Specialist për Rendin, në Komisariatin e Policisë Elbasan; - Inspektor P. B., 54 vjeç, me detyrë Ndihmës Specialist Informacioni, në Komisariatin e Policisë Elbasan; - Inspektor J. GJ., 60 vjeç, me detyrë Ndihmës specialist për ruajtjen e dhomave të sigurisë, në Komisariatin e Policisë Elbasan”, njofton AMP.
Sipas hetimeve paraprake, tre efektivët dyshohet se, me mosveprim dhe në kundërshtim me aktet ligjore dhe nënligjore, nuk kanë marrë masat e nevojshme për sigurimin e personit të ndaluar, duke i krijuar atij mundësinë të largohej.
Ndaj tyre rëndon akuza për “Shpërdorim detyre”, ndërsa hetimet për ngjarjen vazhdojnë.
Agjencia e Mbikëqyrjes Policore thekson se do të vijojë me verifikimet për çdo rast abuzimi apo shkeljeje të procedurave brenda strukturave të Policisë së Shtetit. (A2 Televizion)
A2 CNN Livestream
MUND TE LEXONI GJITHASHTU
