Sekretari i Përgjithshëm i Partisë së Lirisë, Tedi Blushi, është përplasur me përfaqësuesit e mazhorancës dhe kreun e Kuvendit, në mbledhjen e Konferencës së Kryetarëve, duke kërkuar tërheqjen urgjente të akteve normative që lidhen me protestat e studentëve.
Blushi akuzoi qeverinë se po kërkon të vijojë ushtrimin e dhunës shtetërore, ndërsa kritikoi mazhorancën për përfshirjen e këtyre akteve në kalendarin parlamentar. “Kuvendi nuk mund të kthehet në noter të dhunës shtetërore. Kryeaxhenda e këtij institucioni duhet të jenë kërkesat legjitime të studentëve”, deklaroi ai.
Gjatë debatit, Blushi u përplas edhe me kreun e grupit parlamentar të PS-së, Taulant Balla, të cilin e akuzoi se mbron interesat e klaneve kriminale. Ai deklaroi se qëndrimi i Ballës për Reformën Zgjedhore dëshmon, sipas tij, pamundësinë për të garantuar zgjedhje të lira dhe të ndershme me Edi Ramën në pushtet.
Sa i përket Reformës Zgjedhore, Blushi kërkoi që prioritetet e saj të jenë hapja 100% e listave, krijimi i një qeverie teknike dhe zgjedhja e Presidentit nga populli.
“Boll më me deputetë të emëruar nga kryetarët e partive. Deputetët duhet t'i zgjedhë populli”, theksoi Blushi, duke akuzuar mazhorancën se po kontribuon në përshkallëzimin e krizës dhe po kërkon të qeverisë përmes forcës.
(A2 Televizion)
A2 CNN Livestream
MUND TE LEXONI GJITHASHTU
