Koalicionet parazgjedhore kanë çuar në ngërç dialogun politik për reformën zgjedhore. Nga njëra anë demokratët e kanë kusht të panegociueshëm për të vijuar edhe me çështjet e tjera, nga ana tjetër socialistët vijojnë t’i mbeten stoik refuzimit për rikthimin e koalicioneve.
Rivendosja përballë njëri-tjetrit pas një muaji pushim nuk ka rezultuar i suksesshëm për Damian Gjiknurin dhe Oerd Bylykbashin për të arritur në një marrëveshje.
Në takimin me dyer të mbyllura demokrati Bylykbashi hodhi në tryezë edhe një propozim që nuk u pranua nga homologu socialist, me argumentin e këtij të fundit se Kuvendi nuk ka kohë mjaftueshëm në dispozicion për të marrë një mendim të organizatave ndërkombëtare.
“I propozova që në Kod të ishin dy alternativat. Edhe këtë e refuzoi.”
Vullneti i socialistëve për të mos hequr dorë nga pushteti dhe dëshira e demokratëve për rotacion politik mund të lërë emigrantët pa votuar. Mazhoranca është e hapur të diskutojë vetëm votën e emigrantëve dhe çështjen e herësit, në rast të kundërt draftin do ta propozojnë në mënyrë të njëanshme në Kuvend.
PS nuk do lista të hapura 100%, por për të bërë ndryshimin në kodin elektoral i duhen votat e partisë së Sali Berishës, në rast të kundërt shpërndarja e mandateve do t’i lihet KQZ.
Skenari që në të gjithë territorin të votohej në mënyrë elektronike duket se ka rënë, pasi së fundmi vullneti monetar i mazhorancës qeverisëse është tkurrur maksimumi në 5 qarqe. (A2 Televizion)
A2 CNN Livestream
MUND TE LEXONI GJITHASHTU
