Dashnor Sula nuk do të jetë më në Kuvend në Shtator, por sërish kërkon që të jetë pjesë e strukturave të PD. Për A2CNN, Sula shprehet se demokratët duhet të zgjidhin krizën, ku propozon mbajtjen e një Kuvendi Kombëtar pajtimi dhe ristrukturim të plotë nga baza deri në kupolën drejtuese. Sipas tij Berisha nuk duhet të largohet, por të jetë mbikëqyrësi i të gjithë procesit në parti.
“Fatkeqësisht, kriza e PD nuk ka lindur sot”.
Një krizë të vazhdueshme që ka nisur me largimin nga pushteti në vitin 2013, e konsideron deputeti Dashnor Sula situatën në të cilën ndodhet Partia Demokratike. Në një intervistë në A2 CNN, Sula pohon se demokratët janë në udhëkryq por sipas tij ka ende mundësi për t’u ringritur. Zgjidhja duhet të vijë nga kryetari Sali Berisha.
“Kam kërkuar të dorëhiqet zoti Berisha, por duhet të shtyhet në një kohë të dytë. I vetmi njeri që mund të mbaj situatën siç është PD, që të mos bëhet copa-copa është zoti Berisha”, u shpreh Sula për A2 CNN.
Deputeti i mbetur jashtë Kuvendit të ri, pohon se nuk është mjeku më i mirë politik për të shëruar plagët e PD, por sërish është i mendimit se kriza zgjidhet vetëm nëse nis ristrukturimi nga baza deri në kupolën drejtuese.
“Seksion, grupseksion, degët e më pas zgjedhje në degët e PD, te sekretariati e te nënkryetarët. Këtë proces duhet ta ndjek dhe udhëheq Sali Berisha, me një grup pune që nuk ka lidhje, nuk duhet të kenë lidhje me grupin humbës duke nisur me drejtuesit e qarqeve, apo Sekretari i Përgjithshëm e poshtë”, theksoi Sula për A2 CNN.
Por kush mund të jenë drejtuesit e këtij grupi pune?
“Duhet të jenë figura të pastra, dhe madje unë e gjej zgjidhje te ato figura që ishin te lista e hapura, por kandidatët e nominuar te lista e hapur që u provuan që qytetarët u japin besimin”, deklaroi Sula për A2 CNN.
Një tjetër aspekt i krizës sipas tij është edhe mbivendosja e funksioneve parlamentare dhe atyre partiake, ndaj është i idesë që të gjithë deputetët të mos kenë më asnjë funksion në parti.
“Pra duhet të shkëputen funksionet parlamentare, pra nuk duhet të jenë edhe deputetë edhe me funksione në parti... Harrohet baza, nuk kanë kohën e mjaftueshme për t’u marrë me bazën”.
Ristrukturimi i plotë i partisë për Sulën nuk është i mjaftueshëm, por thotë se një zgjidhje më e plotë do të ishte dhe mbledhja e Kuvendit kombëtar, për të bashkuar edhe ata që janë larguar në vitet e fundit.
“Pa një Kuvend pajtimi kombëtar, edhe nëse nesër fillon një rithemelim i dytë do të jetë një çarje tjetër, një degëzim tjetër”, shprehet Sula për A2 CNN.
Deklaron se nuk ka ambicie për të qenë në krye të selisë blu, por nëse nuk ndryshon asgjë në vjeshtë, është i bindur se për të nuk ka më vend në parti. (A2 Televizion)
A2 CNN Livestream
MUND TE LEXONI GJITHASHTU
