Mazhoranca rrëzon kërkesën e opozitës për Komision Hetimor për kompaninë KAYO

Mazhoranca socialiste ka rrëzuar kërkesën e opozitës për ngritjen e një Komisioni Hetimor për kompaninë KAYO.

Kreu i grupit parlamentar socialist Taulant Balla, tha në Konferencën e Kryetarëve se kërkesa nuk përmbush kriteret kushtetuese dhe ligjore për ngritjen e një komisioni hetimor parlamentar, në veçanti kriterin e ekzistencës së një “çështjeje të veçantë”.

“Objekti i hetimit është konceptuar në mënyrë tepër të gjerë dhe përfshin një sërë çështjesh të ndryshme, pa individualizuar qartë faktin apo grupin e fakteve konkrete që duhet t’i nënshtrohen hetimit parlamentar. Nuk janë përcaktuar veprime ose mosveprime konkrete të zyrtarëve publikë apo të përfaqësuesve të shoqërisë “KAYO” Sh.A., aktet ose kontratat konkrete që pretendohet se janë të paligjshme, si dhe periudha kohore në të cilën duhet të shtrihet hetimi. Në këtë mënyrë, objekti synon kontrollin e përgjithshëm të të gjithë veprimtarisë së shoqërisë dhe jo hetimin e një çështjeje të individualizuar me rëndësi të veçantë publike”, u shpreh Balla. (A2 Televizion)