Protesta e 2 prillit të vitit 1991 kundër regjimit komunist që përfundoi me 4 viktima në Shkodër, për Sali Berishën duhet të jetë burim frymëzimi për të gjithë shqiptarët për zgjedhjet e 11 majit që të zgjedhin Partinë Demokratike.
Nga Shkodra ku nderoi 4 martirët e demokracisë, lideri demokrat tha se të gjithë duhet të sakrifikojnë votën e tyre njësoj si heronjtë e 34 vite më parë që sakrifikuan jetën e tyre.
“Ata janë sot burim drite, burim frymëzimi për çdo qytetar që i beson lirisë dhe votës së saj. Martirët e 2 Prillit janë frymëzim i madh për çdo qytetar të sakrifikojë për lirinë dhe votën e saj”.
11 majin e sheh jo si një ditë të zakonshme për zgjedhjet parlamentare, por një datë historike që sipas tij duhet të ndajë epokat.
“11 Maji është dita që ndan histori dhe epoka, ndan diktaturën e bazuar në drogë, nga shteti i të drejtës, liritë dhe të drejtat e qytetarëve. Ndan varfërinë dhe mjerimin në rritje të shqiptarëve nga rruga e mirëqenies, e begatimit të pandalshëm të tyre”.
Lideri i opozitës tregoi bindje për fitore në 11 maj dhe u shpreh se në këta datë do firmosin projektin e ëndrrës shqiptare.
“Projektin e shqiptarëve jashtë varfërisë ekstreme. Projektin e Shqipërisë që prodhon në çdo skaj të saj të mira për qytetarët e saj.”
Në përfundim të aktivitetit në nderim të martirëve të 2 prillit ku morën pjesë dhe kandidatët për deputetë dhe drejtuesit lokal të Partisë Demokratike në Shkodër, Berisha pati dhe një komunikim me median ku deklaroi se nga ky qark do nisë rotacioni politik.
“Shkodra do u japë leksionin më të merituar atyre që menduan se mund ta nëpërkëmbin.”
Në 2 prill 1991, në Shkodër u zhvillua një protestë kundër rezultatit të zgjedhjeve të para pluraliste, që në atë kohë u fituan nga Partia e Punës që mori shumicën dërrmuese të votave në parlament.
Në atë protestë mbetën të vrarë 4 vetë, Arben Broci, Bujar Bishanaku, Nazmi Kryeziu dhe Besnik Ceka, që më vonë u shpallën dëshmorë të demokracisë. Protesta ishte e para e një serie ngjarjesh dhe grevash që çoi më pas në rrëzimin e sistemit në zgjedhjet e 22 marsit 1992. (A2 Televizion)
A2 CNN Livestream
MUND TE LEXONI GJITHASHTU
