Giuseppe Marotta, i njohur thjesht si Beppe, ka arritur një tjetër triumf në kampionat, por kësaj radhe në postin më të lartë të një klubi.
Ky kampionat, i njëmbëdhjeti i karrierës së tij, është në fakt i pari ndërsa mban drejtimin e Interit. Beppe është në krye të Interit nga zgjedhja e Oaktree, i cili dëshironte një drejtues me përvojë për këtë rol, një njeri që mund të balanconte të gjitha forcat e klubit. Dikush si Marotta, në fakt, i cili edhe në shkollën e mesme quhej thjesht "Kissinger", sipas Sekretarit legjendar Amerikan të Shtetit, për aftësitë e tij si ndërmjetës.
Dy vjet pas emërimit të tij si President, ai po korr këtë gëzim të parë: frytin e djersës në fushë, sigurisht, por edhe të ideve të mira. Diskutimet e Presidentit me përfaqësuesit e Oaktree në bordin e drejtorëve kanë qenë të vazhdueshme që nga fillimi, nga anglezja Katherine Ralph te katalanasi Alejandro Cano, i pranishëm pothuajse çdo ditë në katet e sipërme të Viale della Liberazione, si dhe italianët Renato Meduri dhe Carlo Ligori, shkruan A2.
Lëvizjet e zgjuara në një treg transferimesh pa teprime, të koordinuara nga vetë Marotta dhe të menaxhuara nga drejtori sportiv Piero Ausilio me asistentin Dario Baccin, kanë qenë gjithashtu vendimtare. Kjo filloi me intuitën e parë të verës: kur Simone Inzaghi po ikte në shkretëtirë, i tërhequr nga milionat arabë, Interi fillimisht kishte flirtuar me Cesc Fabregas, pastaj ishte drejtuar me forcë te Cristian Chivu, trajneri vendas me vetëm 13 paraqitje në Serie A si trajner i Parmës. Duke pasur parasysh këto rrethana, dhënia e çelësave të shtëpisë Cristianit dukej si një rrezik serioz, megjithatë askush në departamentin sportiv të zikaltërve nuk kishte dyshime.
Që nga ai moment, pjesa më e madhe e punës së Marottës është përqendruar pikërisht në hapjen e një llogoreje në mbrojtje të Chivu, një trajner i aftë të depërtojë në zemrat dhe mendjet e ekipit.
Megjithatë, Marotta i ka mbetur gjithmonë besnik metodës së tij realpolitik, si në 3 titujt me Interin, ashtu edhe në 8 me Juventusin. Për më tepër, asnjë menaxher tjetër në Itali nuk ka arritur ndonjëherë të arrijë shifra dyshifrore në tituj kampionati, ndërsa ai kishte arritur tashmë majën në vitin e yllit të dytë të Interit. Ai tani ka dy më shumë se Gianpiero Boniperti, i cili, si një president operacional te Juventus, kishte vetëm 9 tituj.
Miku dhe mentori i tij Adriano Galliani te Milan kishte arritur 8 tituj kampion. Pastaj, me gjashtë, do të ishin Italo Allodi dhe Luciano Moggi. E vetmja gjë që mungon në numër është një triumf në Evropë, ku ai është afruar shumë here: ka humbur 4 finale të Champions dhe një finale të Europa League. (A2 Televizion)
A2 CNN Livestream
MUND TE LEXONI GJITHASHTU
