Shqipëria ishte skuadra më e mirë në fushë në Arenën Kombëtare dhe këtë nuk e tregoi vetëm fitorja 3-0. Edhe pse rezultati mund të ishte më i thellë, apo në disa raste ritmi i lojës u zbeh, djemtë kuqezi realizuan një ndeshje thuajse perfekte.
Kjo konfirmohet nga statistikat. Dominimi dukej në mbajtjen e topit, që ishte në 85% të kohës në kontrollin e Shqipërisë. Për Andorrën mbrëmja në Tiranë ishte për tu harruar, pasi i ktheu 16 vjet mbrapa në kohë.
Në fakt, ata regjistruan zero tentativa dhe zero goditje në portën kuqezi. Për herë të fundit, këto statistika i kishin regjistruar në vitin 2009, në ndeshjen kualifikuese të Kupës së Botës kundër Ukrainës.
Tejet e madhe edhe diferenca e pasimeve në fushë, me Shqipërinë që realizoi 888 pasime të sakta nga 956 të tilla, ndërsa iberikët vetëm 116 nga 160 pasime të sakta.
Ekipi i Sylvinho-s e realizoi me sukses detyrën. Përballë Andorrës, Kombëtarja zbriti në fushë si ekipi më i mirë dhe kishte detyrën të konfirmohej më e fort edhe gjatë ndeshjes.
Edhe pse përballë ishte një rival modest, i pozicionuar në vendin e 171 të renditjes së FIFA-s, tri pikët e marra kanë shumë rëndësi në garën për vendin e dytë në Grupin K dhe mundësinë për të luajtur në play-off të Botërorit 2026. (A2 Televizion)
A2 CNN Livestream
MUND TE LEXONI GJITHASHTU
