Situatë e pazakontë në gjendje emergjence për shkak të të nxehtit që mund të jetë edhe vdekjeprurës në Britaninë e Madhe, e cila nuk shquhet për nxehtësi ekstreme. Autoritetet atje, u bënë thirrje qytetarëve të përmbahen nga përpjekjet për të shijuar rrezet e diellit, ndërsa për herë të parë parashikohet që temperaturat të rriten mbi 40 celsius.
"Ne mund të shohim njerëz veçanërisht që janë të cenueshëm, të rinj, të moshuar, njerëz të dobët, njerëz që jetojnë me demencë, të cilët vërtet vuajnë. Kjo nuk është si një ditë e bukur e nxehtë ku mund të vendosim pak krem kundër diellit dhe të dalim jashtë dhe të shijoni një not dhe një vakt jashtë. Kjo është nxehtësi serioze që në fakt mund të përfundojë në vdekjen e njerëzve, sepse është kaq e egër dhe ne thjesht nuk jemi të përgatitur për atë lloj vape në këtë vend", thotë shefi ekzekutiv i kolegjit të paramedikëve, Tracy Nicholls
Parashikuesit e motit në Britani, javën e kaluar, lëshuan paralajmërimin e parë të kuq" të të nxehtit ekstrem" për disa pjesë të Anglisë, të hënën dhe të martën. Zyrtarët janë të shqetësuar për efektet në shëndetin e njerëzve dhe në sistemin e kujdesit shëndetësor.
Temperatura më e lartë e regjistruar në Britani ishte më 25 korrik të 2019-s ,kur arriti ne 38.7 celsius. Ndërkohë, vende të tjera të kontinentit janë të përfshira nga zjarret.
Në Francën jugperëndimore, flakët detyruan më shumë se 1500 njerëz të evakuojnë zonën, mes luftës së zjarrfikësve për të vënë flakët nën kontroll, teksa mbi 500 hektarë u dogjën.
"Kemi të bëjmë me thatësirë shumë të konsiderueshme për shkak të reshjeve të pamjaftueshme gjatë dimrit dhe pranverës, një muaj veçanërisht i thatë maji dhe tani kemi temperatura veçanërisht të larta", u shpreh ministri francez i Mjedisit, Berangere Couillard.
Dhjetëra zjarre shpërthyen në Spanjë, duke ndërprerë rrugët dhe duke detyruar mijëra njerëz të evakuohen nga shtëpitë e tyre pasi temperaturat e verës nuk treguan shenja uljeje, ndërsa lugina Jerte në Extremadura, ka qenë pika qendrore e zjarreve më të vështira ditët e fundit.
Për të dielën u parashikuan nga Agjencia kombëtare e motit temperatura deri në 42 gradë në Aragon, Navarra dhe La Rioja, ndërsa vala e të nxehtit pritet të përfundojë të hënën, por përsëri me temperatura që do të mbeten të larta përtej normales.
Situatë e frikshme në provincën Malagas ku u evakuuan mbi 3000 persona, ndërsa përgjatë javës vala e të nxehtit ka shkaktuar 360 vdekje të lidhura me nxehtësinë sipas Institutit Shëndetësor Carlosi i III.
Edhe Italia po përjeton thatësirën më të keqe në 70 vitet e fundit që po përhapet në të gjithë vendin, me tharjen e lumenjve dhe rezervuarëve. Temperaturat javën që po nis pritet të arrijnë deri në 42 gradë celsius në shumë qytete italiane në veri të vendit. (A2 Televizion)
A2 CNN Livestream
MUND TE LEXONI GJITHASHTU
