Tottenham nuk luan në “Air Albania”, eliminohet nga Conference League për shkak të koronavirusit

Nga A2 CNN
20 Dhjetor 2021, 13:03 | Futboll
Tottenham nuk luan në “Air Albania”, eliminohet nga Conference

Tottenham ishte një nga skuadrat pretendente për finalen e sezonit të parë të Conference League, ndeshje e cila do të luhet në Air Albania, por tashmë është jashtë këtij kompeticioni.

Skuadra e drejtuar nga italiani, Antonio Conte, është eliminuar pasi nuk u paraqit në ndeshjen ndaj Rennes, pasi ekipi u kthye në vatër covidi me shumë lojtarë të infektuar. UEFA mori vendimin duke i dhënë fitoren 3-0 në tavolinë skuadrës franceze.

Pas këtij vendimi, Rennes e mbylli grupin në vendin e parë me 14 pikë, duke u kualifikuar për në fazën e ardhshme, Vitesse me 10 pikë në vendin e dytë, ndërsa anglezët të tretët me 7 pikë.

Tashmë për Conten, i cili ndali Liverpoolin në një barazim 2-2 mbrëmjen e së dielës, i gjithë përqendrimi do të jenë në Premier League, ku sezoni nisi keq, ndërsa tashmë kanë arritur të marrin disa rezultate pozitive radhazi. (A2 Televizion)

A2 CNN Livestream

Latest Videos