U akuzua për doping, Valieva: E lumtur, por e lodhur emocionalisht

Kamila Valieva pranoi se është “e lumtur, por e lodhur”, pas vendimit të Gjykatës së Arbitrazhit Sportiv në Lozanë, që i hoqi pezullimin nga Lojërat Olimpike Dimërore dhe i mundësoi që të konkurrojë në garën individuale të patinazhit artistik.

15-vjeçarja rezultoi se kishte përdorur substanca të ndaluara në dhjetor, por çështja e dopingut u zbulua vetëm gjatë Olimpiadës në Pekin, pasi ajo ndihmoi Rusinë të fitonte medaljen e artë në garën ekipore.

“Kanë qenë ditë të vështira për mua. Jam e lumtur, por e lodhur emocionalisht. Gjatë procesit të CAS qëndrova e ulur për 7 orë, patëm vetëm 20 minuta pushim. Ishte tejet e vështirë, por ishte një prej atyre momenteve të vështira në jetë, të cilat duhet t’i kaloj”, deklaroi Valieva.

Edhe pse do të konkurrojë në garat individuale të patinazhit në akull, në programin e shkurtër dhe më pas në programin e lirë, do të garojë me rrezikun se medalja e artë ekipore, apo çdo medalje tjetër që mund të fitojë, mund t’i hiqet në të ardhmen. (A2 Televizion)