Ushtarët e Moskës po zëvendësojnë flamurin ukrainas me atë rus në qytetet e pushtuara  

Forcat ruse po hasin në një rezistencë të fortë në sulmin e tyre ndaj Ukrainës, dhe janë të pakta qendrat e banuara të mëdha që kanë arritur të pushtojnë. Por aty ku kanë arritur të sigurojnë supremacinë ushtarake, vendimet e tyre po e bëjnë të qartë qasjen e Kremlinit për të ardhmen e territoreve të pushtuara.

Kryebashkiaku i qytetit të Skadovsk, para luftës një qendër e rëndësishme turistike në rajonin e Khersonit, në brigjet e Detit të Zi, deklaroi se forcat ruse kanë zëvendësuar flamurin ukrainas me atë rus në të gjitha institucionet lokale.   

Kryebashkiaku Oleksandr Yakovliev nënvizoi se Këshilli Bashkiak i Skadovsk nuk do të bashkëpunojë me pushtuesit. "Asnjë prej nesh nuk do të punojë nën flamurin e tyre, por ne do të vazhdojmë t'i shërbejmë komunitetin tonë dhe vendit”, tha ai, pa dhënë detaje sesi kjo mund të ndodhë në një kohë ku qyteti i tyre me rreth 20 mijë banorë është tashmë nën kontrollin e rusëve.

Fati i Skadovsk nuk është unikal, madje burimet thonë se ditën e djeshme diçka e tillë i ndodhi edhe qytetit Oleshky, po në atë rajon. Prova të tjera këto që i ashtuquajturi "operacioni special" i Kremlinit, është në fakt një pushtim i mirëfilltë. (A2 Televizion)