Vrasja e biznesmenit Dem Backa në Fier, dy ditë më parë, dhe torturat ndaj biznesmenit Nazmi Çangu në Krujë, kanë sjellë edhe reagimin e presidentit Ilir Meta. Në një postim në rrjetet sociale, kreu i shtetit shprehet se këto ngjarje kriminale përbëjnë një kërcënim serioz për sigurinë e jetës dhe pronës së qytetarëve.
“Dënoj me forcë aktet tepër të rënda kriminale të ditëve të fundit, vrasjen e biznesmenit Backa në qendër të Fierit, si dhe grabitjen dhe torturimin e biznesmenit Çangu në Nikël të Krujës. Këto ngjarje, që kanë tronditur thellë opinionin publik, përbëjnë një kërcënim serioz për rendin, sigurinë e jetës dhe pronës së qytetarëve, por edhe për zhvillimet ekonomike dhe sociale të vendit”.
Ai u bën thirrje autoriteteve që të vënë para drejtësisë autorët e këtyre ngjarjeve, por edhe të marrin masa për parandalimin e tyre.
“I bëj thirrje Policisë së Shtetit, Prokurorisë, Shërbimit Informativ të Shtetit, si dhe të gjithë institucioneve të tjera ligjzbatuese në vend, të forcojnë bashkëpunimin për arrestimin e menjëhershëm të autorëve me rrezikshmëri të lartë dhe vënien e tyre para drejtësisë, por edhe për të marrë të gjitha masat efektive për të parandaluar ngjarje të tilla të rënda dhe tronditëse kriminale”. (A2 Televizion)
A2 CNN Livestream
MUND TE LEXONI GJITHASHTU
