Vritet një 40-vjeçar me armë zjarri në Tiranë, gjendet një makinë e djegur

Një person është qëlluar me armë zjarri brenda makinës së tij pranë një qendre tregtare, në zonën e Komunës së Parisit, në Tiranë.

Forca të shumta policie kanë rrethuar zonën dhe po punojnë për kapjen e autorëve të ngjarjes. Në vendin ku ka ndodhur krimi ka shkuar dhe drejtori i Përgjithshëm i Policisë së Shtetit, Ardi Veliu.

Mësohet se viktima është Hekuran Billa, 40 vjeç, i cili kishte dalë nga burgu rreth një vit më parë dhe ka qenë në shërbim prove.

Ndërkohë, një makinë është gjetur e djegur në Pezë, e cila dyshohet të ketë lidhje me ngjarjen.

Menjëherë është ngritur Grupi hetimor dhe nën drejtimin e Prokurorisë po vijon puna për sqarimin dhe dokumentimin e plotë të rrethanave të ngjarjes, si dhe sekuestrimin e çdo prove të vlefshme që do çojë në identifikimin e autorit. (A2 Televizion)