Edhe në Maqedoninë e Veriut zhvillohen sot zgjedhjet lokale, për herë të shtatë që nga historia e pavarësisë së vendit.
Në garë për 80 komuna dhe Qytetin e Shkupit janë 299 kandidatë, ndërsa mbi 10,600 kandidatë për këshilltarë komunalë dhe këshillin e Qytetit të Shkupit.
Më shumë kandidatë për kryetar ka për Shkupin, respektivisht 12, ndërsa Struga dhe Dollneni kanë nga 8 kandidatë, kurse 24 janë kandidatë të pavarur.
Nga kandidatët për kryetar komune vetëm 25 prej tyre janë femra. Të drejtë vote kanë 1 824 864 qytetarë.
Për herë të parë në Maqedoni të Veriut do të votohet me “fingerprint” ose aparate që detektojnë vijat papilare të votuesve.
Autoritetet theksojnë se për mirëmbajtjen dhe kujdesin e procesit të votimit janë angazhuar 400 IT ekspertë dhe janë vënë në funksion dy “Call Centre”.
Gjatë ditës së djeshme të drejtë vote kanë pasur 10.653, një ditë para votimit zyrtar. Procesi u zhvillua në 13 burgje të karakterit hetues dhe ndëshkues. Gjithashtu të drejtën e tyre të votës dje e ushtruan edhe qytetarët e sëmurë, të pafuqishëm, personat e prekur nga Covid dhe ata në izolim, si dhe qytetarët që gjenden në shtëpitë e të moshuarve.
Procesin zgjedhor do ta monitorojnë 1.247 vëzhgues. Prej tyre 870 vendas dhe 367 të huaj. Raundi i dytë i zgjedhjeve lokale do të mbahet më 31 tetor. (A2 Televizion)
A2 CNN Livestream
MUND TE LEXONI GJITHASHTU
