“Asllani shumë i mirë, por po luan i frikësuar për faj të trajnerit”

Trajneri i Interit, Simone Inzaghi, është një nga të akuzuarit kryesorë nga specialistët e futbollit në Itali për krizën që po kalojnë zikaltërit.

Me 4 humbje në 8 ndeshjet e para të Serisë A, skuadra e drejtuar prej tij renditet në vendin e nëntë, me 12 pikë, 8 më pak sesa kryesuesit e Napolit.

Në humbjen e fundit ndaj Romës, për herë të parë u aktivizua si titullar Kristjan Asllani, të cilit i janë dhënë shumë pak minuta nga Inzaghi. Paraqitja e mesfushorit shqiptar u komentua pozitivisht, megjithatë Antonio Cassanos i ka bërë diçka përshtypje në lidhje me ndeshjen e zhvilluar nga 20-vjeçari.

Ish-lojtari i Interit theksoi se mesfushori shqiptar luan i frikësuar, pasi trajneri nuk i jep besim: “Problemi i Interit qëndron në mesfushë, në ndeshjen e fundit aktivizuan atë djaloshin (Kristjan Asllanin), i cili është shumë i mirë. Por, në fushë shihet që luan i frikësuar sepse trajneri nuk i jep besim. Kështu ndodh edhe me Robin Gosens, duket si “peshku pa ujë”. Inzaghi bën mirë të “zgjohet” pasi përndryshe do të jetë shumë vonë”. (A2 Televizion)