Është djegur për herë të dytë brenda një muaji lokali “Zins” që është në pronësi të babait të këngëtarit të njohur të muzikës rap Noizy.
Lokali i vendosur në zonën e Currilave në Durrës ka shpërthyer në flakë në orët e para të mëngjesit, ndërkohë që policia bën me dije se ka arrestuar një të dyshuar që është i afërm me këngëtarin.
Në kuadër të operacionit “Përsëritësi” është arrestuar 26-vjeçari E. M. i cili akuzohet për 3 raste zjarrvëniesh ndaj biznesit dhe banesës së të njëjtës familje.
26-vjeçari u kap në flagrancë, mëngjesin e sotëm, pasi i kishte vënë zjarrin lokalit në lagjen “Currilat”, në pronësi të shtetasit Bashkim Rajku.
Gjithashtu, nga hetimet dyshohet se i njëjti shtetas i ka vënë zjarrin të njëjtit lokal, më datë 11.06.2023, si dhe derës së banesës së nënës së pronarit të këtij lokali, më datë 10.06.2023.
Në momentin e arrestimit, 26-vjeçarit iu gjet dhe iu sekuestrua një mjet prerës.
Kujtojmë, se rreth tre javë më parë lokali u përfshi nga zjarri, ku pati vetëm dëme të shumta materiale. Kjo nuk është hera e parë që bizneset e Noizy sulmohen. Kujtojmë këtu dhe shpërthimin e tritolit ndaj një dyqani veshjesh që këngëtari ka po në zonën e Durrësit. (A2 Televizion)
A2 CNN Livestream
MUND TE LEXONI GJITHASHTU
