
Covid-19 vijon përhapjen duke shtuar të prekurit dhe vatrat e infeksionit. Shkon në 663 numri i personave të prekur në gjithë vendin.
Dy ditë pas 0 rasteve, Tirana rezulton me numrin më të lartë të të infektuarve të rinj, ku tashmë koronavirusi ka “hyrë” edhe në burg. Burgu “313” është vatra më e re dhe më e nxehtë e koronavirusit në Tiranë. Edhe 13 raste të reja janë konfirmuar në 24 orët e fundit në këtë institucion.
Tirana, Shkodra dhe Kruja janë vatrat më të nxehta të COVID-19. Pas lokalizimit të burimeve më të reja të infeskionit, në bizneset e fasonerisë dhe në burgun “313”, epidemiologët kanë shtrirë hetimin tek të gjithë personat e kontaktit.
Ndërkohë, 5 qytete (Berati, Lezha, Mirdita, Rrogozhina dhe Tropoja) kanë dalë nga harta e zonave aktive dhe aktualisht janë me zero raste të reja.
Në dy spitalet Covid është ulur në 34 numri i pacientëve të shtruar, ndërsa 8 janë në terapi intensive. Ndërkohë, një tjetër laborator, krahas atij të ISHP-së, ka nisur testimin për verifikimin e imunitetit ndaj koronavirusit. Në Laboratorin e Mikrobiologjisë në QSUT ka nisur testimi serologjik. Personeli mjekësor është i pari që i nënshtrohet testimit.
Rreth 6 000 teste janë siguruar për kryerjen e analizës serologjike fillimisht tek personeli mjekësor dhe më pas tek efektivët e policisë.
Raporti i Ministrisë së Shëndetësisë
Janë testuar 240 persona të dyshuar me COVID-19. Nga rezultatet e testimeve janë konfirmuar 29 raste pozitive me COVID19, mes të cilëve një personel shëndetësor, e vetëizoluar në shtëpi.
Nga rastet e reja të 24 orëve të fundit, 20 janë në Tiranës, nga të cilat 13 i përkasin një vatre në një institucion të vuajtjes së dënimit, ku po vijon hetimi epidemiologjik, pas zbulimit të rastit të parë. 7 raste pozitivë janë në Krujë dhe 2 raste në Shkodër.
Edhe pse ka një rritje të numrit të rasteve sot, ato janë të lokalizuara në dy vatra që po monitorohen dhe ndiqen me shumë vëmendje nga epidemiologët në terren.
Deri në këto momente janë testuar 6509 raste të dyshuara dhe prej tyre janë të konfirmuar pozitivë me COVID-19, 663 raste.
Gjatë 24 orëve të fundit, 29 pacientë të tjerë i janë shtuar listës së të shëruarve, duke e çuar numrin e të shëruarve nga Covid-19 në 385.
Rezulton se deri tani Berati, Lezha, Mirdita, Rrogozhina dhe Tropoja janë zona ku të gjithë të prekurit deri tani, janë të shëruar.
Aktualisht në vendin tonë janë 251 persona të infektuar aktivë dhe siç shihet numri i të shëruarve është më i lartë. Kjo tendencë tashmë vazhdon të jetë e qëndrueshme.
Ju informojmë se, në shërbimin infektiv aktualisht janë 26 të shtruar nga të cilët 4 pacientë janë në terapi intensive. Në spitalin COVID 2 “Shefqet Ndroqi”, janë 8 pacientë të shtruar. 4 pacientë janë në terapi intensive, në gjendje të rënduar, ndërsa 4 pacientë janë në pavion. Në dy spitalet COVID aktualisht po marrin shërbim 34 pacientë.
Harta e të prekurve nga COVID-19 zgjerohet në Tiranë, Krujë dhe Shkodër.
Shpërndarja gjeografike e rasteve pozitive, është si vijon:
- Tiranë 276 raste
- Durrës 42 raste
- Lushnje 6 raste
- Elbasan 18 raste
- Fier 36 raste
- Kavajë 9 raste
- Rrogozhinë 4 raste
- Korçë 19 raste
- Vlorë 5 raste
- Shkodër 102 raste
- Lezhë 14 raste
- Berat 2 raste
- Has 13 raste
- Krujë 65 raste
-Tropojë 4 raste
- Pukë 5 raste
- Mirditë 3 raste
- Kukës 11 raste
-Mallakastër 1 rast
- Kurbin 28 raste
Pavarësisht luhatjeve në numrat ditorë të zbulimit të bartësve të virusit apo të sëmurëve prej tij, situata është njëlloj e kontrolluar.
Treguesi i vërtetë është numri i të shtruarve në spitale, që vazhdon të mbetet në shifra të qëndrueshme.
Në kushtet e lehtësimit të disa masave, në mënyrë që situata të vazhdojë të jetë e kontrolluar, është shumë e rëndësishme të zbatohen me përpikëri të gjitha udhëzimet e autoriteteve shëndetësore, të respektohet distancimi fizik dhe ruajtja e higjienës personale.
Këto masa duhet të respektohen makimalisht edhe brenda rretheve familjare, duke shmangur vizitat tek të afërmit për çdo lloj arsye.
Nëse keni shenja të sëmundjes COVID-19 telefononi numrin e urgjencës 127. Për çdo pyetje apo informacion rreth COVID-19 telefononi në linjën e gjelbër 0800 40 40. (A2 Televizion)