20 persona janë arrestuar dhe një tjetër është shpallur në kërkim me kërkesë të SPAK, si anëtarë të një grupi të strukturuar kriminal të përfshirë në trafikun e drogës nga Lindja e Mesme në vendet e Bashkimit Europian, si edhe mes Shqipërisë e vendeve të rajonit.
Operacioni i koduar “Coast to coast”, nga bregu në breg, ishte finalizim i një hetimi 2 vjeçar të një skuadre të përbashkët mes prokurorëve të SPAK e atyre të Prokurorisë së Firences në Itali, të koordinuara nga Eurojust.
Nga hetimi janë dokumentuar të paktën 8 episode të trafikut të kanabisit, kokainës, heroinës e resinës, ku vlera e përafërt e drogës së sekuestruar shkon në gati 2.7 mln euro.
Sipas SPAK, kanabisi është siguruar në Siri, heroina në Turqi, ndërsa kokaina nga vendet e origjinës në Shqipëri e më pas drejt vendeve të BE.
Të arrestuarit, mes të cilëve edhe një punonjës i policisë kufitare në pikëkalimin e Muriqanit, akuzohen për “trafik të narkotikëve”, “grup të strukturuar kriminal” e “pastrim parash”.
Ata kanë pasur role të ndryshme në organizmin kriminal, ndërsa mënyra e trafikut ka pasur një specifikë. Gjatë operacionit janë sekuestruar në cilësinë e provës materiale automjete, pajisje kompjuterike, aparate celular, si dhe vlera monetare.
Paralelisht me hetimin penal ndaj të dyshuarve është bërë edhe një hetim pasuror. (A2 Televizion)
A2 CNN Livestream
MUND TE LEXONI GJITHASHTU
