“Nga sot ngrijnë fitimet e tregtarëve të karburanteve”, Rama mbledh qeverinë për paketën e masave

Ashtu siç paralajmëroi dy ditë më parë se brenda javës do të jetë gati plani i masave për të përballuar krizën e çmimeve, kryeministri Rama ka mbledhur qeverinë dhe thotë se paketa e masave po merr formë.

“Paketa e Rezistencës Sociale ndaj pasojave të krizës globale energjetike si edhe të luftës në Ukrainë mbi çmimet po merr formë përfundimtare”, shkruan Rama.

Më herët kryeministri Rama njoftoi se nga sot ka nisur aktiviteti i Bordit Kombëtar të Administrimit të Karburantit, i cili do të kontrollojë çmimet e naftës, si edhe do të ngrijë fitimet e tregtuesve.

“Mirëmëngjes dhe me konfirmimin se nga sot, me ngritjen e Bordit Kombëtar të Administrimit të Karburantit, çmimet do të kalojnë në filtrin e transparencës, për të mos lejuar asnjë abuzim në kurriz të qytetarëve dhe marzhi i fitimit do të ngrijë, sepse kjo nuk është kohë për të nxjerrë fitime, po për të rezistuar të gjithë së bashku, ju uroj një fundjavë të mbarë”, shkroi Rama.

Çmimet e naftës arritën një javë më parë në rekordin e mbi 260 lekëve, duke u shtrenjtuar me gati 70 lekë për një javë, ndërsa në bursa u rritën nga 90 dollarë në 130 dollarë. Rritja e fortë e çmimeve tek ne ka nxitur protesta të shumta të qytetarëve. (A2 Televizion)