Organizata Botërore e Shëndetësisë ka regjistruar rritjen më të madhe të infektimeve nga koronavirusi në një ditë, me Amerikat që numërojnë shumicën e rasteve të reja. 183 mijë persona u infektuan gjatë 24 orëve të fundit; më shumë se 50 mijë prej të cilëve në Brazil, ndjekur nga Shtetet e Bashkuara dhe India.
Megjithatë numri i lartë i personave të prekur lidhet pjesërisht edhe me rritjen e testimeve rreth botës. Brazili bëhet vendi i dytë në botë, pas Shteteve të Bashkuara që regjistron më shumë se 50 mijë vdekje të lidhura me Covid-19.
Bilanci i hidhur vjen mes trazirave të vazhdueshme politike, dhe disa ditë pasi vendi konfirmoi mbi 1 milion infektime. Protesta e kundërprotesta po zhvillohen në vendin ku piku i pandemisë vlerësohet të jetë disa javë larg.
Presidenti Jair Bolsonaro kundërshtoi ashpër masat e kufizimit e ndërmarra nga autoritetet lokale për frenimin e pandemisë. Mbështetësit e tij, kërkojnë fundin e izolimit e rikthimin në punë ndërsa kritikët e ngrenë zërin kundër reagimit të mangët ndaj krizës shëndetësore dhe kërkojnë dorëheqjen e presidentit.
Shtim të konsiderueshëm të rasteve me Covid-19 ka edhe në Shtetet e Bashkuara, ku numërohen tani mbi 2.2 milionë të prekur dhe gati 120 mijë vdekje.
Gjithashtu India raporton rritje drastike të infektimeve. 15 mijë rastet e regjistruara të dielën e çuan në mbi 400 mijë totalin e personave të prekur me Covid-19, ndërkohë që viktimat në vend janë 13 mijë e 254.
Lajme më të mira vijnë nga Pekini, ku gjatë 24 orëve të fundit pati vetëm 9 raste të reja. Kjo është hera e parë në më shumë se 10 ditë, që kur shpërtheu një valë e re e koronavirusit, që të dhënat janë me numër njëshifror. (A2 Televizion)
A2 CNN Livestream
MUND TE LEXONI GJITHASHTU
