Russell Brand do të përballet me një “ferr të vërtetë mbi tokë” brenda burgut HMP Wandsworth, në Londër, ka deklaruar një ish-i burgosur i këtij institucioni.
Brand, 51 vjeç, u shpall fajtor një javë më parë për një akuzë përdhunimi dhe tri akuza për sulm seksual. Të hënën, ai u dënua me 10 vite e gjashtë muaj burg.
Aktualisht, ai po mbahet në burgun e Londrës Jugore, i cili është një nga burgjet më të mëdha të Anglisë, të ndërtuara gjatë epokës viktoriane.
Chris Atkins, i cili vuajti tetë muaj burg në HMP Wandsworth për mashtrim me taksat, e përshkroi këtë institucion si një “ferr të vërtetë mbi tokë”.
Duke folur për BBC, ai u shpreh: “Muaji i parë është padyshim më i keqi. Tronditja psikologjike është jashtëzakonisht e madhe. Kështu ishte për mua dhe për të do të jetë dhjetë herë më e rëndë, për shkak të natyrës së veprave për të cilat është dënuar dhe rënies së tij nga një pozitë kaq e lartë.
Atij i duhet të përballet me realitetin dhe me tronditjen e fortë fizike e psikologjike që vjen kur papritur e gjen veten të mbyllur në një qeli burgu për javë të tëra, pa pasur pothuajse askënd me të cilin të flasë. Është diçka e tmerrshme.”
Një burim pranë komedianit tha se ai po ia dilte “çuditërisht mirë, duke pasur parasysh rrethanat” dhe se ishte transferuar nga izolimi në një sektor të zakonshëm të burgut.
Një punonjës i burgut Wandsworth tha se mes të burgosurve kishte pasur “shumë entuziazëm” për mbërritjen e Brand.
“Burgjet janë vende të mërzitshme dhe prania e Russell Brand në mesin e tyre u ka dhënë të burgosurve diçka për t'u argëtuar. Ata kanë goditur me forcë dyert e qelive dhe kanë bërtitur emrin e tij. Ai është një përdhunues, ndaj ka pasur gjithashtu zemërim për atë që ka bërë. Ne jemi plotësisht të vetëdijshëm për këtë reagim”, u shpreh punonjësi.
Dokumentacioni dhe procedurat burokratike të burgut thuhet se përbëjnë gjithashtu një sfidë të madhe për të burgosurit e rinj. Marrja e lejes për të kryer telefonata dhe plotësimi i kërkesave për vizita mund të zgjasin shumë, pasi duhet të kalojnë nëpër disa hallka të sistemit për t'u miratuar.
Atkins tha: “Ai nuk do të ketë ende asnjë person të regjistruar në listën e vizitorëve. Vizitorët duhet t'i nënshtrohen një sërë verifikimesh. Numrat e telefonit duhet të miratohen. Këto kontrolle nuk kryhen shpejt dhe duhet të dish se si t'i bësh këto kërkesa.
Shpesh nuk ka askënd aty për të të shpjeguar se si funksionojnë të gjitha këto procedura, ndaj duhet t'i mësosh vetë.”
Ai tregoi se iu deshën pesë javë për të takuar djalin e tij të vogël. Kanë kaluar vetëm pak ditë që kur Brand u dënua me më shumë se dhjetë vite burg.
Në këtë fazë, askush nuk e di se çfarë e pret në të ardhmen. Me kalimin e kohës, ai mund të transferohet në një burg tjetër, ku regjimi është më pak i rreptë dhe kushtet janë më moderne.
Udhëzimet parashikojnë se të dënuarit me katër ose më shumë vite burg për disa vepra të rënda të dhunshme ose seksuale lirohen pasi të kenë vuajtur dy të tretat e dënimit. Në rastin e Brand, kjo do të thotë se ai mund të lirohet pas shtatë vitesh burg. (A2 Televizion)
A2 CNN Livestream
MUND TE LEXONI GJITHASHTU
