Bota ka hyrë në një “zonë të rrezikshme të motit ekstrem”, ndërsa efektet e fenomenit El Niño kanë nisur të ndihen në mbarë botën, ka paralajmëruar kreu i OKB-së, António Guterres.
Organizata Botërore Meteorologjike (WMO) ka publikuar të dhënat më të fundit mbi këtë fenomen natyror, duke paralajmëruar se ai mund të jetë më i fuqishmi në më shumë se 70 vjet dhe të zgjasë të paktën deri në shkurt të vitit 2027.
El Niño ndryshon modelet e motit në të gjithë botën. Disa rajone përballen me thatësira, ndërsa të tjera mund të goditen nga tajfune më të fuqishme dhe përmbytje.
Parashikuesit e motit paralajmërojnë gjithashtu se El Niño do të sjellë rritje të temperaturave në disa zona, duke iu shtuar ngrohjes globale të shkaktuar nga ndryshimet klimatike si pasojë e aktiviteteve njerëzore.
“El Niño po merr përmasa të jashtëzakonshme para syve tanë. Shkenca nuk lë vend për dyshime: planeti ndodhet në territore të panjohura dhe këto territore po ngrohen gjithnjë e më shumë”, tha Guterres.
Autoritetet dhe shkencëtarët në vende të ndryshme po marrin masa për të ulur rrezikun e humbjeve të jetëve, zhvendosjeve të popullsisë dhe dëmeve mjedisore. Janë forcuar sistemet e paralajmërimit të hershëm dhe po planifikohet ofrimi i ndihmës mjekësore përpara se të godasin ngjarjet ekstreme.
Megjithatë, fuqia e këtij episodi të El Niños ka ngritur shqetësime të veçanta për komunitetet dhe grupet më të cenueshme.
Organizata Botërore Meteorologjike, agjenci e Kombeve të Bashkuara, tha se ka nisur një mobilizim të gjerë për të shpërndarë sa më shumë të jetë e mundur parashikimet për fenomenet ekstreme të motit që mund të shkaktohen nga El Niño.
Sekretarja e Përgjithshme e WMO-së, Celeste Saulo, paralajmëroi se El Niño mund të shkaktojë pasoja të rënda për komunitetet dhe ekonomitë në mbarë botën.
(A2 Televizion)
A2 CNN Livestream
MUND TE LEXONI GJITHASHTU
