Drejtuesit e NATO-s dhe Komisionit Evropian kanë paralajmëruar se Rusia po bëhet gjithnjë e më e pamatur dhe janë zotuar se do t’i përgjigjen një “normaliteti të ri”.
“Leipzig shënon një përshkallëzim të ri në territorin e Bashkimit Evropian, që i atribuohet drejtpërdrejt Rusisë”, tha presidentja e Komisionit Evropian, Ursula von der Leyen, një ditë pasi Gjermania akuzoi Rusinë për një sulm të dështuar me dron në aeroportin e Leipzigut.
Sekretari i Përgjithshëm i NATO-s, Mark Rutte, tha se aleanca, ku përfshihen edhe Shtetet e Bashkuara, qëndron “në solidaritet të plotë me Gjermaninë”.
Rusia i ka hedhur poshtë akuzat se më 4 gusht kishte shënjestruar një avion transporti ukrainas me një dron të mbushur me eksploziv.
Në përgjigje të sanksioneve të reja të Gjermanisë, Rusia ka deklaruar se do të mbyllë qendrat kulturore të Institutit Goethe të Gjermanisë në territorin rus.
Droni u çaktivizua nga një robot në aeroportin Leipzig/Halle, ndërsa dyshohet se një dron i dytë u përplas me një tjetër avion transporti.
Një dron i tretë, sipas raportimeve, u gjet 10 ditë më vonë në aeroport, i cili është një pikë e rëndësishme e NATO-s dhe përdoret rregullisht nga avionët ukrainas të transportit Antonov.
Vetëm të martën, qeveria gjermane deklaroi se hetimet e policisë dhe gjetjet e shërbimeve të inteligjencës kishin provuar se pas incidenteve qëndronte Rusia.
(A2 Televizion)
A2 CNN Livestream
MUND TE LEXONI GJITHASHTU
