Dy shpërthime me lëndë plasëse në Durrës, dëme në një lokal dhe një garazh

Dy raste të shpërthimit të lëndëve plasëse janë regjistruar gjatë orëve të para të mëngjesit në Durrës, duke shkaktuar dëme materiale.

Rasti i parë është shënuar rreth orës 03:50, në lagjen nr. 11, ku një sasi e vogël lënde plasëse është hedhur në derën e jashtme të një lokali duke shkaktuar dëme të lehta materiale.

Gazetarja Elitjona Doku raporton se lokali është në pronësi të Gëzim Kajnos, i cili është arrestuar në vitin 2024 si personi që ka ekzekutuar Asllan Kërtushën në 2016-ën.

Sakaq, rreth orës 04:30, një tjetër sasi lënde plasëse është hedhur në derën e garazhit të një automjeti në zonën e Shkallnurit, përgjatë aksit rrugor Plepa–Ndroq. Edhe në këtë rast janë shkaktuar vetëm dëme materiale.

“Rreth orës 03:50, në lagjen nr. 11, Durrës, në derën e jashtme të një lokali në pronësi të shtetasit G. K., është hedhur një sasi e vogël lënde plasëse. Si pasojë, janë shkaktuar vetëm dëme të lehta materiale. Gjithashtu, rreth orës 04:30, në zonën e Shkallnurit, në anë të rrugës Plepa–Ndroq, është hedhur një sasi lënde plasëse në derën e garazhit të një automjeti, duke shkaktuar vetëm dëme materiale”, thuhet në njoftimin e Policisë. 

Grupet hetimore, po vijojnë veprimet për mbledhjen dhe administrimin e provave, zbardhjen e plotë të rrethanave, si dhe identifikimin dhe kapjen e autorëve.

(A2 Televizion)