Lideri Suprem i Iranit bëhet “i gjallë”. Komandanti i Shtabit të Përgjithshëm Iranian, Khatam al-Anbiya, takoi udhëheqësin Mojtaba Khamenei, të cilit i paraqiti një raport mbi gatishmërinë e forcave të armatosura, duke e siguruar atë se forcat iraniane janë shumë të përgatitura.
Televizionet iraniane, të cituara nga Al Jazeera, raportuan se lideri Suprem i dha direktiva të reja komandantit për të vazhduar “përballjen me armiqtë me forcë dhe vendosmëri”. Komandanti i Shtabit të Përgjithshëm konfirmoi se çdo gabim ose sulm “do të kundërshtohet me vendosmëri dhe shpejtësi” dhe konfirmoi ekzistencën e planeve për të kundërshtuar “aktet armiqësore nga amerikanët dhe sionistët”, shkruan A2.
Nuk u publikuan imazhe të takimit. Mojtaba Khamenei nuk është parë në publik që kur mori detyrën nga babai i tij, Ali Khamenei, në mars. “Nëse Irani do të sulmohej përsëri, armiqtë e tij do të përballeshin me armë, metoda dhe arena luftimi të papritura”, tha zëdhënësi i ushtrisë iraniane, gjeneral brigade Mohammad Akraminia, në një intervistë të transmetuar të dielën.
Ai shtoi se anijet, shtetet e të cilave ndjekin sanksionet e SHBA-së kundër Iranit, do të përballen me vështirësi në kalimin e Ngushticës së Hormuzit. “Populli ynë nuk do t'i nënshtrohet kurrë armikut dhe të flasësh për negociata nuk do të thotë dorëzim apo tërheqje, por qëllimi është të realizohen të drejtat e kombit iranian dhe të mbrohen interesat kombëtare me autoritet”, citohet të ketë thënë presidenti iranian nga mediat lokale.
Ndërkohë, më herët, Teherani paralajmëroi se do të nisë një “sulm të rëndë” ndaj aseteve amerikane në Lindjen e Mesme nëse anijet e tij përballen me sulme të mëtejshme gjatë armëpushimit.
Të dyja palët shkëmbyen zjarr rreth Ngushticës së Hormuzit në ditët e fundit. Ndërsa Uashingtoni ende po pret një përgjigje nga Teherani mbi një propozim për t'i dhënë fund konfliktit. (A2 Televizion)
A2 CNN Livestream
MUND TE LEXONI GJITHASHTU
