Dy ish-agjentë të Byrosë Federale të Hetimit (FBI) janë akuzuar në lidhje me një hetim të vitit 2020 për një laptop që i përkiste Hunter Bidenit, djalit të ish-presidentit amerikan Joe Biden.
Ish-zyrtarët, Nikki Floris dhe Bradley Benavides, akuzohen për gënjeshtër para Kongresit. Ata dolën për herë të parë para gjykatës të premten në Uashington, DC.
Avokatët e tyre akuzuan Departamentin e Drejtësisë se ka ngritur akuzat me qëllim rikthimin e kësaj çështjeje të bujshme, vetëm pak ditë përpara zgjedhjeve të 3 nëntorit për Kongresin, në të cilat republikanët përballen me një sfidë të vështirë nga demokratët për të ruajtur kontrollin e tij.
Një avokat i Floris deklaroi se ajo “i shërbeu vendit tonë si oficere e përkushtuar e inteligjencës në FBI për gati 20 vjet”, ndërsa akuzoi Departamentin e Drejtësisë se e ka ndërtuar çështjen e tij mbi dëshmi të dorës së dytë.
“Megjithatë, sot, Departamenti i Drejtësisë e ka akuzuar atë në mënyrë të rreme për një krim, duke u mbështetur te pretendimet e politikanëve dhe jo te faktet”, thuhet në deklaratë.
“Nuk është rastësi që qeveria po i ngre këto akuza të pabaza tani, vite më vonë, në prag të zgjedhjeve.”
Floris dhe Benavides drejtonin Task-Forcën e Inteligjencës së Huaj (FITF) në FBI, në kohën kur u zbulua laptopi i Hunter Bidenit. Të dy dëshmuan para Kongresit se kjo njësi, e cila fokusohet te ndërhyrjet e huaja në zgjedhjet amerikane, nuk ishte përfshirë në hetimin për laptopin. (A2 Televizion)
A2 CNN Livestream
MUND TE LEXONI GJITHASHTU
