Një burrë italian habiti të gjithë teksa u rikthye në atdhe nga Shtetet e Bashkuara, pasi në bagazh iu gjet koka e një krokodili të rrallë, një specie në rrezik zhdukjeje.
Ai kishte mbërritur në Torino me një fluturim nga Miami, përmes Stambollit, bëri të ditur njësia e Torinos e policisë financiare italiane në një deklaratë. Koka e zvarranikut ishte mbështjellë me letër të trashë ngjyrë kafe, në përpjekje për ta fshehur nga kontrollet e sigurisë dhe doganat, përcjell A2 CNN.
Ajo u sekuestrua menjëherë nga autoritetet kufitare, ndërsa pasagjeri, i cili raportohet se po kthehej nga pushimet, u vu nën hetim me dyshimin për kontrabandë të një ekzemplari që i përket një specieje të mbrojtur.
Krokodilët mbrohen nga Konventa e Uashingtonit, një marrëveshje globale e nënshkruar në vitin 1973 për të mbrojtur bimët dhe kafshët e rrezikuara nga rreziku i tregtisë ndërkombëtare.
Nëse shpallet fajtor, burri përballet me një gjobë nga 20 deri në 200 mijë euro, ose me një dënim me burg nga gjashtë muaj deri në një vit.
Policia tha se operacioni në Torino ishte pjesë e një aksioni më të gjerë në Itali kundër tregtisë së paligjshme të kafshëve të egra. “Sendi u sekuestrua sepse ishte importuar pa certifikatën ose licencën e kërkuar”, thanë autoritetet.
Italia është një qendër e rëndësishme transiti për tregtinë e paligjshme të kafshëve ekzotike, pjesa më e madhe e së cilës lidhet me krimin e organizuar. Në një raport të publikuar në fillim të këtij viti, dega italiane e WWF-së tha se kafshë të tilla si “breshkat, zogjtë dekorativë, zvarranikët tropikalë dhe madje edhe primatët e vegjël tregtohen në mënyrë të paligjshme përmes kanaleve online dhe shkëmbimeve ndërkufitare”. Në vitin 2025, sipas raportit, në Sicili u sekuestrua një shimpanze që mbahej në mënyrë të paligjshme.
Megjithatë, sende të tilla si kokat e thara të krokodilëve ndonjëherë blihen nga turistët si suvenire, pa e ditur se është e paligjshme t’i marrësh me vete kur kthehesh në vendin e origjinës. Vitin e kaluar, një burrë kanadez u arrestua në aeroportin e Delhit pasi në bagazhin e tij u gjet koka e një krokodili, të cilën e kishte blerë në Tajlandë. (A2 Televizion)
A2 CNN Livestream
MUND TE LEXONI GJITHASHTU
