Irani pritet të marrë brenda pak javësh dërgesën e parë me rreth 400 sisteme portative kineze të mbrojtjes ajrore, të njohura si raketahedhëse supi. Këtë e thanë për Reuters tre burime me dijeni mbi çështjen.
Lëvizja vjen në një kohë kur Teherani po përpiqet të rindërtojë kapacitetet e tij mbrojtëse pas luftës me Shtetet e Bashkuara.
Marrëveshja, me një vlerë prej 60 deri në 70 milionë dollarësh, konsiderohet një nga investimet më të mëdha të njohura të Iranit për forcimin e mbrojtjes ajrore me rreze të shkurtër që nga shpërthimi i konfliktit me SHBA-në dhe Izraelin, shkruan A2 CNN. Lufta nxori në pah dobësitë e sistemit iranian në mbrojtjen e bazave ushtarake dhe infrastrukturës strategjike.
Sipas burimeve, kontrata parashikon blerjen e 300 deri në 400 sistemeve portative të mbrojtjes ajrore, përfshirë raketat kineze QW-12 dhe FN-16.
Ministria e Jashtme në Pekin nuk iu përgjigj kërkesës për koment. Ajo është shprehur më herët se raportime të tilla janë "plotësisht të pabaza" dhe se Kina ka luajtur vazhdimisht një rol në promovimin e paqes dhe dhënien fund të konfliktit.
Irani ka nevojë të riarmatoset pas disa muajsh luftime, gjatë të cilave SHBA-ja dhe Izraeli kanë goditur infrastrukturë të lidhur me raketat, dronët dhe programet e mbrojtjes ajrore.
Ekspertët ushtarakë thonë se sistemet portative të mbrojtjes ajrore janë të rëndësishme, pasi mund të shpërndahen shpejt në terren, të operohen nga ekipe të vogla dhe të zhvendosen vazhdimisht. Kjo i bën ato shumë më të vështira për t'u goditur krahasuar me bateritë fikse të mbrojtjes ajrore dhe u jep forcave ushtarake fleksibilitet më të madh. (A2 Televizion)
A2 CNN Livestream
MUND TE LEXONI GJITHASHTU
