Kryeministri i Groenlandës: E drejta e vetëqeverisjes duhet të vijojë, duam dialog dhe respekt të ndërsjelltë me SHBA-të

Kryeministri i Groenlandës, Jens-Frederik Nielsen, thotë se vendi i tij zgjedh "Groenlandën që njohim sot".

Sipas mediave të huaja, duke folur në një konferencë për shtyp, ai tha se “si pjesë e Mbretërisë së Danimarkës, ne kemi zhvilluar shoqërinë tonë, demokracinë dhe vendin tonë... në kuadër të Mbretërisë së Danimarkës dhe aleancës së NATO-s”.

"Ne kemi fituar vetëqeverisjen, të drejtën tonë për vetëvendosje brenda këtij kuadri. Kjo duhet të vazhdojë", tha ai, shkruan A2 CNN.

Duke iu referuar demonstratave gjatë fundjavës kur mijëra njerëz protestuan në kryeqytet, Nuuk, Nielsen shpjegon se ato nuk ishin "kundër SHBA-së".

"Nuk ishte një demonstrim kundër miqësisë sonë të gjatë apo bashkëpunimit të ngushtë. Ishte kundër mungesës së respektit për sundimin ndërkombëtar të ligjit, demokracinë dhe të drejtën tonë për vetëvendosje", tha ai.

"Ne kemi kërkuar dhe do të vazhdojmë të kërkojmë dialog dhe respekt përmes diplomacisë dhe kanaleve normale", përfundon ai. (A2 Televizion)