Dukesha e Sussex, Meghan Markle, ka shpjeguar arsyet e ndërprerjes së marrëdhënies me të atin, Thomas Markle, duke deklaruar se vendimi për të mos e lejuar atë të kishte kontakt me fëmijët e saj ishte marrë për t’i mbrojtur ata.
Në një deklaratë të fundit, Meghan iu referua akuzave për të cilat thotë se ishte informuar në vitin 2018, si dhe spekulimeve të shumta mediatike që ndër vite kanë shoqëruar marrëdhënien e saj me të atin.
“Pavarësisht shtrembërimit të disa publikimeve mediatike gjatë viteve, çdo distancë nga babai im dhe zgjedhja ime për të mos e lejuar atë të kishte kontakt me fëmijët tanë, ishte për një arsye: për t’i mbrojtur ata”, deklaroi Meghan.
Ajo shtoi: “Shpresoj që tani të kuptohet”.
Marrëdhënia mes Meghan dhe Thomas Markle nisi të përkeqësohej në periudhën para dasmës së saj me Princin Harry, në maj të vitit 2018. Thomas, i cili jetonte në Meksikë pas daljes në pension në Shtetet e Bashkuara, u bë pjesë e disa intervistave mediatike, ku foli publikisht për marrëdhënien me vajzën e tij.
Pak ditë para dasmës mbretërore, ai u tërhoq nga ceremonia pasi iu nënshtrua një ndërhyrjeje kirurgjikale në zemër. Në vitet që pasuan, Thomas Markle u shpreh disa herë publikisht për mungesën e kontaktit me të bijën, Princin Harry dhe më vonë edhe me nipërit e mbesat.
Ndërkohë, Meghan nuk kishte dhënë më parë një shpjegim të drejtpërdrejtë për arsyet e distancimit, duke nxitur spekulime të shumta në media. Disa pretendime sugjeronin se ajo dëshironte të mbronte privatësinë e familjes së saj, ndërsa të tjera e lidhnin vendimin me deklaratat e vazhdueshme publike të të atit.
Sipas raportimit, Meghan thotë se ishte informuar për “akuza shqetësuese” ndaj Thomas Markle në vitin 2018, pas martesës me Harryn. Akuzat janë mohuar nga i ati i saj.
Që prej asaj kohe, komunikimi mes tyre ka qenë shumë i kufizuar. Sipas raportimit, Meghan i kishte shkruar të atit edhe pasi ai iu nënshtrua një ndërhyrjeje kirurgjikale në Filipine, në fund të vitit të kaluar. (A2 Televizion)
A2 CNN Livestream
MUND TE LEXONI GJITHASHTU
