Partia opozitare e qendrës së djathtë Tisza, ka rritur ndjeshëm avantazhin ndaj partisë në pushtet Fidesz, të kryeministrit Orban, sipas një sondazhi të publikuar të mërkurën, në prag të zgjedhjeve parlamentare të 12 prillit.
Orban, i cili synon të ruajë pushtetin pas 16 vitesh në qeveri, përballet për herë të parë me një sfidë të fortë në një votim parlamentar, ndërsa rezultati shihet me rëndësi jo vetëm për Hungarinë, por edhe për Europën dhe për forcat politike të djathta radikale në kontinent, shkruan A2 CNN.
Sondazhi tregon se Fidesz po humbet terren, ndërsa Tisza po fiton mbështetje. Tisza, e drejtuar nga ish-anëtari i qeverisë Péter Magyar, ka rritur avantazhin ndaj Fidesz me 20% mes votuesve të vendosur, nga 12% që kishte në një sondazh të janarit. Partia e Magyar, e cila u themelua në vitin 2024, ka mbështetjen e 55% të votuesve të vendosur, nga 51% në janar.
Mbështetja për Fidesz ra në 35%, nga 39% një muaj më parë, sipas sondazhit të kryer midis 18 dhe 23 shkurtit. Tisza ka mbështetjen e 42% të të gjithë votuesve, ndërsa Fidesz 31%.
Përveç dy partive kryesore, vetëm partia e ekstremit të djathtë Mi Hazánk ka shanse të hyjë në parlament, me mbështetje prej 6% nga votuesit e vendosur, nga 5% në janar. Partitë duhet të fitojnë të paktën 5% për të marrë mandate.
Sondazhi i Median ka një nga rekordet më të forta të parashikimeve të sakta në Hungari. Ai parashikoi saktë fitoren e thellë të Orbán në zgjedhjet e fundit katër vjet më parë.
Orbán deklaroi javën e kaluar gjatë fushatës në Sumeg se sondazhet tregojnë që Fidesz mund të fitojë në 65-70 nga 106 qarqe zgjedhore individuale, nga 87 katër vjet më parë, por ende mjaftueshëm për të ruajtur pushtetin.
Parlamenti i Hungarisë ka 199 anëtarë, 93 të zgjedhur nga listat partiake dhe 106 të zgjedhur direkt nga qarqet zgjedhore. (A2 Televizion)
A2 CNN Livestream
MUND TE LEXONI GJITHASHTU
